Cruz Cora Aruba y “Aruba Wine and Dine Hospitality Group” a yega na un aliansa di termino largo. Representantenan di ambos organisacion a firma e acuerdo di cooperacion siman pasa na oficina di Cruz Cora na Dakota.
Cruz Cora ta un organisacion humanitario internacional cu aproximadamente 97 miyon miembro boluntario y staff rond mundo, funda pa protege bida humano y salud, pa sigura respet pa tur ser humano, y pa preveni y alivia sufrimento humano. “Aruba Wine & Dine” ta un di e principal lidernan den sector di hospitalidad di Aruba cu diferente restaurant.
E contribucion anual di “Wine and Dine” lo brinda apoto na e principal tareanan di Cruz Cora, manera ayudo ora di desaster, entrenamento medico y distanciamento social. E acuerdo tambe ta inclui entrenamento den forma continuo pa tur staff di e grupo di hospitalidad, como tambe apoyo medico durante eventonan grandi.
“Como un di e lidernan den e negoshi di hospitalidad na Aruba, nos ta kere cu ta hopi importante pa duna bek na e comunidad local. E trabou cu Cruz Cora a bin ta haciendo, ta simplemente espectacular. Specialmente den e temponan aki durante e crisis di COVID-19, nan ta sirbiendo y yudando hopi hende cu ta depende di caridad pa sobrevivi. Nos ta hopi contento di por a yega na e acuerdo di cooperacion aki, ya cu nos ta kere cu e profesionalismo y empatia di Cruz Cora, lo tin un influencia hopi mas sostenibel den e bienestar en general di e personanan den necesidad na Aruba,” Kevin Slangen, Managing Director di “Aruba Wine and Dine” a expresa.
E aliansa aki ta resultado di e ‘We Care Initiative’, un programa special di felicidad, liderazgo social y caridad di “Aruba Wine and Dine”. E curason di e iniciativa aki ta AWD Charity Foundation – un organisacion no lucrativo cu su principal obhetivonan ta actividadnan filantropico y bienestar general (p.e. actividadnan educacional of otro actividadnan sirbiendo interes publico) na Aruba.
“Aruba Wine and Dine Hospitality Group” ta e principalmente sponser y den e ultimo añanan a brinda apoyo na diferente iniciativa- y programanan social, manera por ehempel: Restaurant Week su ganashinan a bay pa cas di anciano Maris Stella, Adopt an Addict, celebracion dianan festivo pa e grandinan (Pasco, Pasco Grandi, etc.) ayudo na e club di landamento sincronisa ‘The Barracudas’, programa di ayudo na COVID, esta e “One Happy Community” y na “ Disabled Golf Association Aruba”.
Riba e potret por mira representantenan di ambos organisacion durante e ceremonia di formamento di acuerdo.
