Prome Minister: Marisol Lopez Tromp a informa di actonan dudoso y a pidie pa investiga

1693

Impasse den politica pa loke ta gobernacion ta un tema cu Prome Minister Evelyn Wever Croes, a trece dilanti. Loke ta pasando ta mustra en realidad con cosnan no mester bay den politica na Aruba. Un problema di partido, a bira problema di henter un pais, el a cuminsa pa bisa.

Prome Minister Wever Croes, a bisa cu un partido ta apunta un persona como Minister. Awo cu POR no a logra trece solucion, el a tranca Gobernacion. Wever Croes a bisa di tabata kier a intermedia den e asunto aki, pero e reaccion cu el a ricibi tabata cu Parlamento mester atende cu e tema.  

Prome Minister Evelyn Wever-Croes su reaccion riba impase den coalicion

Prome Minister Evelyn Wever-Croes su reaccion riba impase den coalicion

Posted by 24ora on Monday, August 3, 2020

Apesar di su situacion di salud, e mandatario a bisa cu despues cu a para e reunion di diabierna ultimo, el a tuma contacto diasabra cu Marisol Lopez Tromp pa mira ki momento nan por topa. Pa su sorpresa, el a bin tende cu el a biaha pa Hulanda y cu nan lo por reuni via di Zoom, algo cu e mandatario cu ta lidera e Gobierno a bisa cu e ta prefera di no haci, ya cu e kier pa combersacionnan sosode personalmente.  

El a bisa cu e tambe a keda sorprendi pa algun tema treci dilanti den e reunion di Parlamento di diabierna ultimo. E trahado spirito ta algo cu tin di Gobierno anterior y parce a sigui sosode. “Ami personalmente a kere cu nos a keda cu overtolligheidspool so y no tin trahado spirito. Asina nos a bis’e y a pidie pa kita nan for di trabou y cuminsa investigacion,” e mandatario a bisa.

Pa loke ta e expresion di Lopez Tromp cu a pone nan altura di algun cos dudoso, el a bisa cu loke e sa di dje “no ta bira cara y ta atende cu nan.” A bis’e pa percura pa tin relato y haci investigacion, y entrega keho. Esaki relaciona cu tur e casonan cu el a inform’e di dje, pero e no a haya documentonan.

Tabatin retraso riba cierto cosnan den investigacion pa cual e mes a dicidi di entrega keho y tabata trata aki di incinerator. El a pidi pa Parlamento traha rapport y refuta loke Bosman a bisa, y a mand’e pa OM pa un Feiten Onderzoek.

Gobernacion no ta algo leuk of facil, e ta algo hopi duro, si mira loke Marisol Lopez Tromp a bisa cu el a pasa aden. Unda cu mester para duro, unda tin interesnan pa tene cu nan y cu esun di pais Aruba mester prevalece. “Bisando tur esaki, cada Minister mester carga su responsabilidad. Mi no ta un juffrouw di Kindergarden. Nan a huramenta di haci esaki na “eer en geweten”. Ami ta haci adicional pa percura cu tin continuacion. Tin un acusacion riba mesa cu el a trece cercami. Un comerciante cu a bisa cu el a haci na un donacion na un otro minister di nos Gabinete. Mi a cuminsa un investigacion mesora, papiando cu e Minister y e comerciante. E ultimo aki a keda di pone su relato riba papel. Cos no a caba, pasobra mi ta warda mas informacion, pa manda esaki pa Ministerio Publico,” Wever Croes a expresa.

El a enfatisa cu ta masha importante pa scucha ambos banda di medaya. No por tira riba tur cos cu ta move pasobra no tin bala ta keda pa ora cu bo mester tira mes. No saca conclusion sin scucha e otro banda di medaya.

Tambe el a bisa cu no ta tur cos ta bay mesora publico cu nan, y mester haci investigacion prome. No por yega tira tur cos y ta prefera laga Ministerio Publico haci su trabou.  

Tin algun cos si cu e no tabata na altura di dje, manera e asunto di trailer. El a mencion’e dos siman pasa y a pidie pa wak bon con e asunto aki ta hinca den otro pasobra Hulanda ta envolvi. Di e terenonan den Colony si e no tabata na altura di esaki.

“Mi ta hopi indigna cu na momento cu nos ta den crisis, e hendenan ta kere cu por haci practicanan di pasado,” e mandatario a expresa..

Awo e ta en espera di regreso di e mandatario pa mira si ta yega na un solucion y pa loke ta corupcion ta actuando. Corupcion ta putri cualkier organisacion.