Despues di algun luna di preparacion pa habri cu un cara nobo, diasabra ultimo Waterpark a habri su portanan bek pa pueblo di Aruba. Na mesun momento a keda presenta esnan cu ta forma parti di e team nobo di gerencia.
A construi e parke na aña 2010, unda cu turista y localnan por bin disfruta di un dia ameno den naturalesa, cu hopi biaha nos turistanan no conoce.
Hopi biaha nan ta disfruta mas tanto banda di lama. Den e caso aki, e luga a wordo diseña practicamente como un mina di oro. P’esey diferente caminda, por mira imagennan cu ta dirigibo na e mina di oro aki.
E iniciativa a bin pa crea e Water Park aki memey di naturalesa. E compania mes ta bezig cu proyectonan nobo den e proximo lunanan. Jean Carlos Espinal a comenta cu e ta contento di a haya e oportunidad y ta gradici partnernan cu a yuda pa e renobacion di e waterpark.
E proyecto aki ta loke cu Espinal a mira, como hoben, e necesidad cu tin riba nos isla. Tin biaha nos famianan ta core rond y pensa kico pa haci cu e muchanan. Sea bay lama of bay un caminda sinta come cu nan.
El a mira e bunita proyecto aki y a pensa cu e luga aki ta uno cu tin asina hopi potencial, no solamente pa bin un diadomingo, pero den siman tambe, pa bin pasa tempo y respira e aire fresco di nos naturalesa.
Ta p’esey mes a tuma e decision pa tuma e luga over completamente. Un team grandi di persona cu ta trahando duro riba e luga. Tin un bon ekipo lifeguard sin conta e cushina y tambe un bon ekipo di siguridad cu sigur lo trece un cambio.
Esnan cu a bin den pasado, a disfruta bon experiencia di e luga. Awor aki ta garantisa cu e luga lo ta un experiencia inolvidabel.
E luga
A haci un remodelacion di cuater luna y mey mas of menos. Tin basta trabao cu a haci y ainda falta hopi mas pa haci. Pero e demanda tabata hopi grandi pa por a habri. Riba Facebook tabata haya compania cu tabata yama y puntra pa fiesta, etc. E ora a dicidi pa habri. Tin un plan pa futuro cu lo bay haci mas extension. Asina nan kier bin cu diferente slide pa mucha, cambia e otro slipnan cu tin pa nobo y haci hopi mas cos na e luga. Ta bay tin un borchi poni parti patras, caminda cu tur hende cu bin na e luga, por wak e futuro di e waterpark.
Tur eseynan kier pone riba un borchi y e ora tin un idea kico tur e tereno grandi cu tin parti patras kier haci cun’e.
A renoba dos pool completo parti patras. Esun di mucha a renob’e completamente. A haci algo na e landscaping tambe. Tambe kier haci e camindanan nobo. Tin un structura di cas cu lo bin eynan y p’esey tin cu wak con esaki lo bay ta exactamente.
Lev Varela a comenta cu for di augustus Jean Carlos Espinal ta bezig cu e proyecto aki. Cu e experiencia cu Varela tabata tin cu e parke y e constructor, tabata tin algun cos cu tabata tin cu mehora sigur.
A traha riba esaki. Ta bezig aworaki y lo garantisa pueblo cu experiencia cu ta bay duna for di awo p’adilanti, ta bay ta un experiencia unico, di loke lo bay paga p’e, ta bay sinti e diferencia.
E diferencia den sentido di e calidad, e amabilidad y e servicio. Mas cu claro e siguridad, cu cada mucha, adulto, cada persona cu bin den e parke, e experiencia cu lo bay pasa ta uno inolvidabel.
Entrada
E cuminda sirbi ta netamente crioyo. Tambe tin e all inclusive buffet cu a introduci. Adultonan ta paga 75 florin. Bo ta haya bo desayuno, bo lunch y atardi tin snacks. Bo tin hamburger, chicken tenders, french fries, cual ta te cu 5’or di atardi.
Tambe tin prijs pa mucha, cual ta 4 pa 12 aña ta paga 50 florin y loke tin tambe ta bon, ta esnan cu ta 65+ tambe ta paga 50 florin. Tur esaki ta all you can drink, all you can eat, durante henter dia. Ta un prijs di famia awendia y den e temporada cu nos ta aworaki den fin di aña.
Waterpark ta habri for di 9’or di mainta te cu 5’or di atardi. Si bo no tin nada di haci of bo ta pensa kico pa haci, Waterpark ta un opcion pa bo bin pasa un rato hopi ameno cu bo famia of tambe riba bo mes, disfruta di un dia cu cumindanan delicioso y tambe bo bebida faborito.
