Diahuebs 25 di april 2019 a marca historia den cuadro di reapertura di oficina di turismo na San Nicolas, completamente renoba, ‘State of the Art’. E reapertura a wordo efectua door di Gobernador Suplente Yvonne Lacle-Dirksz, hunto cu Minister di Turismo Danguillaume Oduber y CEO di Aruba Tourism Authority Ronella Tjin Asjoe-Croes. Ademas por a aprecia presencia di diferente Parlamentarionan, miembronan clave di San Nicolas y di turismo en general.
E Visitor Information Center ta cay directamente bao guia di Aruba Tourism Authority y ta brinda turistanan informacion tocante di Aruba en general y informacion di specificamente San Nicolas. Esaki ta un paso importante pa cu mas integracion di San Nicolas y tur locual e ta ofrece, incluso su rikesa cultural y natural.
Den e ultimo 2 añanan A.T.A. a delinea strategia pa cu desaroyo di e producto turistico den e plan pa esaki cu ta carga e nomber ‘Cu Mira pa Futuro’, tambe den un plan dirigi riba segmentonan cu por desaroya mas -cual nos ta yama e ‘Niche Roadmap’ pa Aruba. Enfoke mas profundo riba desaroyo di e producto turistico ta inclui den e estudio di capacidad di carga mara na nos turismo, cu A.T.A. ta finalisando na e momentonan aki. Por ultimo tur accionnan cu A.T.A. por responsabilisa su mes p’e ta inclui den su plan anual y den su plan strategico te cu 2021.
Tur accion ta pues delinea y ta mara na e modelo di crecemento turistico: “High Value, Low Impact”. Porcierto di parti di A.T.A. ta gradecido di mira e input cu a wordo incorpora na un manera integral den entre otro maneho economico di pais Aruba, den e plan nacional strategico pa Aruba y den varios otro programa di maneho di parti di gobierno.
Un di e puntonan di enfoke, basa tambe riba maneho turistico delinea pa gobierno di Aruba, … ta e desaroyo di San Nicolas como un area diferente na Aruba, uno unda e aspectonan cultural y artistico ta sobresali. Pero tambe e rikesa natural di e area.
Esaki no ta algo nobo, y A.T.A. a inverti entre otro den cursonan pa tour operadornan y esnan interesa pa asina duna nan ideanan nobo y herment pa por brinda tournan cu temanan specifico di San Nicolas. Ademas a co-inverti den realizacion di diferente museo. A inverti den maneranan di por duna e bishitantenan miho informacion pa medio di diferente borchi. A sostene grandemente e evento di Aruba Art Fair y otronan den e area di San Nicolas, y e Island Festival cu lo estrena na luna di mei binidero. Ta sostene y forma parti integral di upgrading completo di e area di Baby Beach. Y A.T.A. a crea hopi mas informacion referente San Nicolas, cual desde awo padilanti lo comparti, den un bachi nobo. Poco poco sigui presenta informacion di ‘San Nicolas City’, carga pa su propio imagen …. uno colorido, …. locual ta visibel pa medio di e oficina di turismo renova.
E diseño di e ‘Visitor Information Center’ ta uno hopi colorido y ta duna un impresion di e ‘branding’ cu a crea pa ‘San Nicolas City’. Pa yega na esaki a contrata un agencia local cu expertisio den esaki, a sigui un proceso rigoroso, unda cu a sigui un ‘bottom-up approach’ y a dialoga cu hopi den e comunidad di San Nicolas entre otro, pa asina scoge diferente color y diseño. Pa medio di esaki ta gradici tur cu a forma parti di e proceso aki cu a ser efectua dos aña pasa y cu A.T.A. lo cuminsa desplega, gradualmente, desde awe, …. incluso riba www.aruba.com.
E ‘Visitor Information Center’ lo no ta solamente un punto di informacion, pero pronto lo brinda tournan cortico, enfocando riba temanan specifico, na oranan fijo durante di dia.
A.T.A. ta gradici tur esnan cu a traha duro riba e proyecto aki. ‘Ban cuida nos oficina di turismo renova y ‘State of the Art’ y sigui trece desaroyo pa San Nicolas.
