E conflicto y gritonan eyfo pa e trato cu ta dunando Venezolanonan dor di Guarda Nos Costa a yega Venezuela. Hopi ta e kehonan cu esunnan cera ta expresa y hasta otronan pafo publicamente tambe ta keha pa e trato cu e hefe di Guarda Nos Costa ta dunando na e ilegalnan. Trudy Hassel ta busca forma pa tene menos ilegal riba nos isla.
E team di Guarda Nos Costa ta sali caya y gara ilegalnan regularmente. Na Aruba tin hopi stranhero cu status ilegal y mayoria ta for di Venezuela. Entre e ilegalnan tin bon y malo. Tin di nan cu tin famia tambe cu ta criminalnan na Venezuela y nan mes na Venezuela a comete crimen y ta bin Aruba y keda ilegal sin cu pueblo sa kico nan ta haci pa sobrevivi riba nos isla.
Hasta localnan ta criticando maneho den Guarda nos Costa
Awor cu frontera ta cera ta scucha basta grito publico pa algun cu ta sali defende e ilegalnan cera den Guarda Nos Costa. Kizas e expresion y forma di actua di Trudy Hassell ta mas bien salo riba e herida. Papia malo cu e famianan cu bin busca drechi di nan ser keri cera den Guarda Nos Costa ta mas bien gasolin riba e candela.
Bandidonan a cay den e maneho awo
E kehonan riba e trato di Trudy Hassell a yega Venezuela y cerca bandidonan. E video aki a cay den nos poder for di Venezuela. E persona aki dimes ta un criminal arma, probablemente tin famia ilegal na Aruba cu a pasa den mal rato ba Guarda nos Costa.
Promesa di Glenbert Croes (MEP)
Den campaña 2017, actual Minister Glenbert Croes a priminti stranheronan un maneho cu lo a inclui “amnestia”. E tempo ey el a graba e video na Spaño, pa ta sigur cu tur stranhero por a compronde su promesa. Awor el a yaya e cartera di Labor y e ta dicidi ken ta haya permiso of no, pasobra mayoria stranhero ta bin Aruba pa traha. Famia di stranheronan cu a deposita nan confiansa den e politico awor a nota cu no solamente no a bin cu amnestia, sino cu a haci e maneho di Guarda nos Costa hopi mas estricto y dirigi pa gara ilegalnan y deporta nan mas lihe posibel for di nos pais.
Guarda nos Costa mester protega nos frontera
Cifranan oficial emiti dor di IASA y uza pa e mesun Prome Minister Wever-Croes na inicio di su periodo, ta cu na Aruba tabatin mas o menos 17 mil Venezolano ilegal. Esey ora compara tur cu a drenta e ultimo 5 añanan pero no a sali mas via Migracion. Expertonan ta sigura cu e cifra ey ta mucho mas awendia. Bisando esaki, ta evidente cu tin un problema serio den comunidad cu stranheronan ilegal cu no por keda man crusa mas. Of ta legalisa esunnan cu tey y inclui nan (aunke mayoria ta trahando caba) den nos mercado laboral y laga nan paga impuesto. Of mester start un maneho pa deporta tur, aunke no tin avion actualmente bulando pa Venezuela. Un cos ta sigur, no por culpa Trudy Hassel ni ningun trahado di Guarda nos Costa, pasobra nan ta ehecutando maneho di Ministernan Andin Bikker (casa cu Colombiana) di Husticia y Glenbert Croes (casa cu Venezolana) di Labor.
Aumenta siguridad na Guarda nos Costa
Minister mr. Andin Bikker lo mester evalua seriamente awor pa tin Polis arma na Guarda nos Costa pa proteha e trahadonan eyden. Ta conoci cu e personal di Guarda nos Costa no ta Polis y como tal no ta autorisa pa carga arma di candela. Esey ta haci e situacion na nan base banda di Brandweer na Sabana Berde masha peligroso!
Maneho awor ta cambia dependiendo “ken” ta e ilegal
Kisas e stranheronan ta rabia tambe, pasobra ta conoci cu e maneho di Ministernan Andin Bikker di Husticia y Glenbert Croes di Labor ta yena di excepcion. Tin stranheronan deporta for di Aruba, cu a drenta bek pidi asilo, a nenga nan y toch a haya permiso di e dos mandatarionan menciona. Kisas ta depende cu cua abogado bo ta traha y e “no” di Departamento di Labor por bira un “si” toch despues.
Menasa serio!
Pa loke ta e video di menasa, scuch’e Bo mes y saca bo conclusion. Kisas Siguridad Nacional di Aruba por activa nan departamento di inteligencia cu esun di Venezuela pa yega na e persona aki cu ta menasa di bin un rato atende e asunto cu arma si sigui mete cu su famianan.
