Aruba Taekwondo Bond (ARTBO) a cuminsa c’un camp cu ta dirigi pa maestro Julio Cesar Ramos. E training aki ta pa un siman largo. E training camp aki no ta solamente p’e scolnan di taekwondo cu ta forma parti di seleccion, pero e ta pa tur scol.
Moises Fernandez, presidente di ARTBO, a splica cu nan a inicia cu e camp aki cu ta bou direccion di maestro Julio Cesar Ramos, kende tabata coach nacional di Aruba pa algun aña. Awo e ta biba y dirigi e Centro di Alto Rendimento na Nuevo Leon, Mexico. Maestro Ramos ta encarga di e training aki y ta haci esey hunto cu algun atleta cu a bin di e seleccion di Nuevo Leon. Aparte aki na Aruba tin Jennifer Baez Garcia, kende a gana medaya di brons na Weganan Centro Americano y di Caribe.
E presidente di ARTBO a indica cu e training camp aki ta pa tur scol di Aruba. No solamente p’e scolnan di cu ta forma parti di e seleccion di Aruba. Evidentemente e ta bay tin un trabou specifico cu e atletanan. E idea ta pa cubri mayor atleta di Aruba, sea ta den pre of ta post pa bay seleccion por yega n’e evento aki.
Fernandez a enfatisa cu ta bay tin training mainta cu ta specifico pa seleccion, cual ta di 5:00 pa 7:00 am. Despues ta di 6:00 – 9:00 pm tur anochi. Diabierna ta bay tin sesion di Poomsae y esaki lo ta duna pa Baez Garcia. Diasabra nan ta bay tin un campeonato pa tur scol di Aruba.
Jenniffer Baez Garcia, atleta di taekwondo Poomsae, a conta cu su participacion n’e Weganan Centro Americano y di Caribe a bay bon. El a termina cu medaya di brons di Poomsae den e campeonato aki.
E siguiente aña nan plan ta pa bay Panamericano Adulto y Campeonato Mundial Adulto. P’esey e trainingnan ta bay bira intensivo, pasobra e nivel di competencia ta uno mas halto. E nivel mundial tin mas participante y esey ta pone cu Baez Garcia mester bay train mas hopi p’e siguiente aña.
Den e Centro Americano tabatin seis atleta, pero tabata trata di esunnan miho. El a competi cu atleta mas hoben y mas experencia.
