SEPPA a tuma nota di e reaccion di Minister Dangui Oduber riba Departamento di Recurso Humano (DRH) riba henter e asunto andando rond di e caso di e Director di Directie Volksgezondheid na Corte.
Sin mester bai riba e caso di e Director ariba su mes, loke si a hala atencion di SEPPA ta e tema di ‘imparcialidad’ cu ta keda menciona.
Un cos ta sigur “Imparcialidad” na tur momento y pa henter e aparato publico ta loke tur hende ta spera di e departamento importante aki.
Awo e hecho cu un Minister ta cuestiona e ‘imparcialibidad’ di DRH ta hopi peligroso y ta crea dudanan serio riba e e departamento aki. Ademas e frustracion bao di e propio trahadornan di e departamento aki. SEPPA ta duda cu esaki ta loke nos como comunidad kier!
Cu por sosode cu un Gobernante no ta keda contento cu un conseho, peor si esaki ta bai contra loke e ta desea, SEPPA por compronde. Pero di eynan ta loke un gobernante y tur hende mester siña biba cune. Pero enbez di crea duda di e forma aki, crea frustracion bao di trahadornan nos mester cultiva disciplina, respet aunke no tur cos ta sali manera nos a pens, mas ainda si nos wak e relacion inevitabel entre politica akin a Aruba y departamento aki ya cu tur dos ta responsabel pa conduci asuntonan di nos pais.
Pakiko nos ta papia di crea duda, pa motibo cu tur cos ta mustra cu un cierto momento a surgi diferencianan. E por ta diferencianan di opinion, di interpretacion, pero tambe por ta diferencia entre loke por of no por di acuerdo cu nos reglanan. Un gobernante no por spera consehonan cu ta combinie solamente.
Gobernantenan mester semper tene na mente cu nan ta pasahero, awe nan tey y despues por ta otro. Den e trayecto aki hopi cambio por tuma lugar, hopi leynan y reglanan na cual tur hende mester por tene su mes na dje. Y e trahadornan cu ta ocupa un cargo publico manera esnan cu ta traha departamento DRH tin cu hasi su trabao, su investigacionnan cu diligencia y honestidad, e consenshi, madurez, responsabildidad y e sentido di deber. Esaki na tur momento, tur caso y no ta solamente loke como sindicato SEPPA ta spera di un departameto di DRH pero nos comunidad henter ta pidi di tur empleadonan publico.
Ta pesey mes den henter e aparato publico y mas ainda DRH cu mester atende cu un of otro gobernante mester keda busca na cultiva e inteligencia, e balornan y hasta modera e caracter di gobernantenan cu mayoria biaha ta spera loke nan kier so y den caso di no logra, no ta duna e mihor reaccion cu tur e consecuencianan manera a sosode aworakinan tambe.
Ta durante hopi aña caba SEPPA a bin ta exigi serca gobernantenan pa nos enfatisa e importancia pa tin servicionan publico di calidad. Y ora nos ta papia di servicio publico di calidad esaki ta loke tambe nos ta spera, esta departamentonan di gobierno, cu empleadonan publico professional riba nan tereno cu mester mantene nan mes leuw di politica. Eherce nan trabao manera debe ser, cu consenshi limpi, sin influencia algun y cu no mester haya nan mes envolvi den discusionnan politico of cu mester defende nan mes como tal contra politica.
Mas ainda paso trahadornan di DRH p.e. tin cu atende cu e politico ey di turno cu na e momento ey e hefe cu ta exigi y desea cosnan cu no tur biaha por. Principalmente durante periodonan serca di eleccion, SEPPA ta mira cuanto presion ta wordo poni riba DRH pa tur e ‘deseonan politico’ di e gobernante ta wordo cumpli. Y ora nos ta papia di ‘deseo’ no necesariamente ta papiando di procesonan, asuntonan cu ya tabata riba caminda pa keda cla, sino asuntonan cu ‘diripiente y a corto plazo’ mester wordo ‘gefix’. Mayoria biaha contra tur regla of tur etica. Loke atrobe ta bolbe bai contra e principionan di Servicionan Publico di Calidad.
Ta un berdadero lastima, pero ta parce cu ariba tur cos, tur e bon intencionnan pa Aruba ta goza di servicionan publico di calidad cu nos ta lubida cu trahadornan na promer lugar ta ser humano y merece tur respet.
Tambe cu e trahadornan di DRH debe su comunidad, cu su salario ta wordo paga pa nos sociedad y por lo tanto tin un responsabilidad y un compromiso cu e comunidad na cual ademas e mester respeta. Y cu tur loke por a insinua of keda sin bisa, lo mester a wordo trata of aclaria internamento paso aworakinan e Duda a keda.
E consecuencia di henter e desaroyo fastioso aki ta cu poco a poco e interes pa hendenan capacita y cu experiencia riba asunto di maneho di personal ta bira menos. Netamente pa motibonan di politica. Politica di awendia pero tambe di pasado.
Lo tabata mas miho pa nos enfoca y trata otro cu hopi mas riba etica ya cu solamente cu esaki gobernantenan por determina e husticia of inhusticia den tur caso.
