E delegacion di schaak cu a representa Aruba na India a regresa contento cu nan logro. Nan a gana seis titulo. Pa cuater aña nan tabata prepara nan mes p’esaki.
Carol Pesqueira-Williams, delegado di Team di Aruba, a splica cu nan a gana e titulo di FM, CM y a bay cu e titulo di damas Annelaine Jacobs cu ta e miho den e di dos borchi. Aruba a competi den categoria grupo femenino di 168, mientras den open group homber tabata 188. Tur dia tabatin wega y no tabata facil. E weganan tabata cuminsa 3:00 pm y esey ta pone pa 12:30 pm ya tur hungado mester ta den bus, pasobra e distancia tabata leu. Tabata regresa hotel 10:00 pm.
E competidonan a haci nan esfuerso pa tene Aruba su nomber na halto. Schaak ta un deporte inteligente, deporte di pensa. P’esey Pesquiera-Williams ta invita un y tur pa yega na nan clubhuis pa bira hungado di schaak.
Octavio Croes, ex-presidente di Federacion di Ahedres, a splica como e tin hopi aña den ahedres, el a ripara cu pocopoco e interes ta subi. Nan tin un trainer internacional di Cuba y e ta hayando hopi mucha pa participa n’e training tur diasabra. A haya titulo di master, pero pa prome biaha nan ta haya e score aki. Desde 2002 e federacion ta participa den competencia internacional di schaak y e score mas halto cu a haya ta esaki. El a splica cu normalmente te ocho nan ta yega, pero e biaha aki a yega nuebe punto.
Randy Tromp, presidente di Federacion di Ahedres, a splica cu e no a mira di tabatin reto pa manda un delegacion competi. E tabata mira esaki como un etapa cu ta siña p’e siguiente biaha. E logronan cu e delegacion aki a bini cu ne, nan a cuminsa cu ne cuater aña pasa.
A bin c’un plan, a percura pa bin c’un coach, seleccion tabata den training pa cuater aña y awo por mira e resultado. A bin cu diferente titulo y tabata tin e oportunidad pa bin cu medaya, pero Tromp ta kere cu den e ultimo rondonan e presion tabata un tiki halto y ey por a faya.
Pa mas lesa TREMPAN.COM.
