Un di e aspectonan unico di e proyecto Caribbean Town Aruba ta e integracion entre arte y estilo di bida di e futuro propietarionan. Director di Caribbean Town, Ing. Victor Acosta, a informa artistanan local cu e proyecto di vivienda moderno lo dispone di diferente espacio destina pa obra di arte, entre otro riba fachada di su edificionan, como tambe sculptura riba e promenade y su rotonde.
Caribbean Town ta reconoce e balor grandi di arte y su influencia positivo den e bida diario di esunnan cu ta bin den interaccion cu esaki. Pa e motibo aki, Caribbean Town a cera un partnership cu Cosecha Aruba pa coordina un colaboracion exitoso entre artistanan local y un plataforma nobo di arte den e comunidad residencial moderno aki.
Den un prome rond di presentacion a toca San Nicolas. E team di Caribbean Town a introduci nan mes na e tienda Cosecha di Caya Grandi, di e futuro proyecto di vivienda vertical na un grupo di artistanan local, entre otro Armando Goedgedrag, Diana Hopman, Mo Mohammed, King Lie Kwie y Sharina Gumbs.
Durante di dos anochi e presentacion a tuma luga na e tienda Cosecha di Playa, caminda artistanan manera Ana Luidens, Lucia Solis, Yahaira Maduro Albus, Ana Fit, Pauline Bons, Hendrik Schouten, Gilma de la Cruz, Natasha de la Fuente, Rhoda Berg, Cream of Wu, Suelynn Dankerlui y Paul Wong a acudi pa haya informacion. E dos encuentronan tabata super placentero, unda e artistanan local a vocifera nan satisfaccion cu un proyecto di vivienda cu lo brinda un atencion special na arte y a manifesta nan interes di participa cu nan obranan.
Victor Acosta a splica e tecnica di print riba un tipo special di tiles cu ta di high resolution y lo keda den un bon estado pa 10 aña. E tecnica aki tambe ta wordo uza pa e artista plastico Romero Britto, kende tambe a manifesta su deseo di participa den Caribbean Town hunto cu nos artistanan local.
Pronto e desaroyado di Caribbean Town y Cosecha lo informa mas di e proceso pa e seleccion di artistanan y nan arte cu sin duda lo embeyece 3e proyecto Caribbean Town enormemente.
