Riba e di tres y ultimo dia di e Consulta Interparlamentario di Reino (IPKO), TREMPAN a combersa cu delegado di Aruba, parlamentario dr. Arthur Vallejo riba prome participacion den e encuentro aki bi anual aki. Indicando cu su experiencia ta uno positivo den diferente aspecto, dr. Vallejo a resalta e parti di comunicacion. A duna ehempel cu ta na Boneiro a haya sa for di homologonan cu Hulanda tambe lo implementa e exigencia di recorta 60 miyon pa aña for di sector di cuido medico.
Como un nobato di IPKO, dr. Vallejo ta sinti cu e meta mas importante y cu a cumpli cu ne tambe tabata e acercamento mayor di loke ta sosodiendo den Reino. El a gradici su colega di fraccion y lider di e delegacion na IPKO, Rocco Tjon pa trece dilanti e mensahe di e daño- y consecuencianan negativo cu e recorte ta generando den salud publico.
CONEXION CU DELEGACION DI CORSOU
Di mesun forma a establece conexion cu delegacion di Corsou caminda por a delibera, compara y construi. “Ta importante pa e relacionnan aki ta fuerte. IPKO a cumpli cu mi expectativa”. Asina mes, e parlamentario hoben a indica cu a papia riba maneranan pa ahusta futuro edicionnan di IPKO pa trata mas topico.
Pa loke tabata e gruponan di trabou cu su persona, mescos cu tur otro miembronan di e delegacion Arubano a forma parti di dje, dr. Vallejo a resalta e frente comun tabatin durante e encuentro. “Mi ta kere cu tabatin hopi acercamento cu, kisas ora ta na Aruba, e tension di politica normal no ta permiti esey. Pero aki bo ta wak cu por pone cabes hunto y traha loke ta bon pa Aruba y mester ta asina semper”.
