Arte di Palabra a presenta obranan excelente den Cas di Cultura

Diasabra a tuma luga Arte di Palabra den Cas di Cultura. Ta un competencia di poesia y cuenta cortico. Hoben di scolnan avansa por a bin competi, sea cu un poesia of propio cuenta, of tambe un poesia existente of un cuenta existente.

ADV

Segun Stan Dabian, relacionista publico y comunicacion na Departamento di Cultura, esaki ta di 11 edicion cu Arte di Palabra a tuma luga. Departamento di Cultura ta hopi contento cu e proyecto aki, con e proyecto aki ta desaroya, mirando participacion tambe di e hobennan y por bisa diasabra anochi, tabata tin varios obra hopi excelente, hopi bunita.

Arte di Palabra a presenta obranan excelente den Cas di Cultura

Posted by 24ora on Sunday, April 14, 2019

Diferente tema a ser trata. Un total di 28 hoben a participa. Tur esnan cu a presencia Arte di Palabra 2019, a gosa di un anochi bunita, pasobra tin talento entre nos hobennan.

Pero principalmente Departamento di Cultura ta haci esaki pa stimula e muchanan, e parti di lesamento, e parti di haci bon uzo di nos idioma Papiamento y esey ta hopi bunita di e proyecto.

Diasabra anochi tambe tabata tin dos instancia cu a haya reconocimento, cual ta Bo Guia y Tele Aruba. Bo Guia a haya e reconocimento pasobra nan ta contribui den musica y toca hopi cosnan local y como tambe haci hopi cos pa loke ta nos idioma y tambe TeleAruba ta haya e reconocimento pa nan programa di Mente Inteligente, caminda cu e contribucion cu esaki ta duna na e hobennan cu ta participa den esaki. Pesey nan a wordo reconoci.

Reaccion

E reaccion ta grandi, segun Dabian. Por a mira e tayernan cu John Freddy Montoya a duna dos dia, unda cu nan ta gosa di e tecnica cu e ta duna, con pa articula, con pa trece nan obra den un miho forma. Dabian a mira poco obra interesante unda cu ta puntra di unda ta saca esaki. Diferente tema a keda presenta diasabra anochi riba escenario di Cas di Cultura.

MC Brian Dirksz a haci un tremendo trabao. Minister di Enseñansa, Ciencia y Desaroyo Sostenibel, dr. Rudy Lampe tabata tey presente. Tambe tabata tey presente miembronan di Parlamento, Sue-Ann Ras, Shailliny Tromp y Hendrik Tevreden. Ta contento cu nan ta apoya e evento aki. Minister di Cultura, Xiomara Ruiz-Maduro no tabata tey presente, pero si a duna su discurso por medio di video.

Esaki sigur tabata un exito. Bunita di e obra aki ta cu diasabra anochi tabata tin e competencia na Corsou y Boneiro. Tur tres isla tin e competencia pasobra e ganadonan di diasabra anochi lo bay participa na Corsou e aña aki, dia 18 di Mei, pa wak ken ta gana Arte di Palabra ABC.

Preparacion

E preparacion ta un di e instrumentonan cu Departamento di Cultura ta haci cu tur biaha, ora yega e momento, ta acerc e docentenan di Papiamento, pa asina motiva e hobennan di nan scol, pa nan participacion y yuda nan cu tur esakinan. Tin cu bisa cu aña pa aña ta haya participacion di e docentenan y DCA ta contento cu esaki. Nos mester stima, cuida, promove y wak pa mas y mas nos sa di e bon uzo di nos idioma Papiamento.

Gradicimento

Stan Dabian a gradici e grupo corector, a gradici fundacion Lanta Papiamento, ta gradici e comision organisador, cual ta varios di coleganan di Dabian mes di ambos seccion. Seccion di Investigacion y Documentacion y esun cu a trek e proyecto aki ta sra. Julie Emerencia cual ta hefe di seccion Implementacion. Director, drs. Siegried Dumfries, kende ta para totalmente tras di e proyecto aki. Algun hende cu a sponsor, boluntarionan, huradonan cu a participa diasabra anochi. Dabian no kier a laga ningun hende afo, pero ta hopi contento cu ta hayando apoyo pa realisa un bunita proyecto pasobra tin diferente dinamismo den dje. E uzo di papiamento, e intercambio di e muchanan y e manera cu hopi di nan a bisa cu ta un oportunidad cu nan ta haya pa expresa cierto sentimento, conta cierto temanan dilanti. Ta hopi contento pa e proyecto aki di Arte di Palabra.

Resultadonan:

Obi Tromp, di Colegio San Antonio, Klas 1-2, a bay cu e premio di miho poesia existente.

Categoria B Poesia Original 1-2

Tercer luga: Samantha Garcia-Guevara, Colegio San Antonio, a bay cu e obra Un Mundo Nobo.

Di Dos luga: Cayley Figaroa, John Wesley College, a bay cu e obra Un Pensamento.

Prome luga: Loui-Angelo Bislick, Colegio San Antonio, a bay cu e obra Heroenan Infantil.

Resultado Categoria C Poesia Original klas 3-6 of EPI

Tercer luga: Shaniqua Jones, John Wesley College, a bay cu e obra Curason herida… cra contento.

Segundo luga: Dignairy de Vos, John Wesley College, a bay cu e obra Dicon.

Prome Luga: Rafael Garcia, Mon Plaisir College, a bay cu e obra Humanidad.

Resultado Categoria E, Cuenta Original klas 1-2

Tercer Luga: Dayron Vrolijk, Colegio San Antonio, a bay cu e obra Morto.

Segundo Luga: Xie-Marie Larmonie, Colegio San Antonio, a by cu e obra Mi kier yora, pero mi no por.

Prome luga: Cayley Figaroa, John Wesley College, a bay cu e obra E Dia Tan Spera.

Resultado Categoria F cuenta original klas 3-6 of EPI

Prome luga: Rafael Garcia, Mon Plaisir College, cu e obra Buelta inecesario.

Un palabra di pabien ta bay na tur e ganadonan di Arte di Palabra.


Comments

comments