Un grupo di 5 studiante na Universidad di Aruba den e Facultad di Hospitalidad y Turismo ta organisando un fundraising event como parti di e curso MICE (Meetings, Incentives, Conventions, and Events) Management cu nan ta siguiendo.
E grupo di studiante aki a dicidi di organisa un Blue Bingo event pa asina recauda fondo pa Fundacion Respeta Mi, un organisation sin fin di lucro dedica na concientisa e pueblo di Aruba riba e topico di abuso di mucha den su diferente formanan.
Fundacion Respeta Mi ta un centro di informacion cu por brinda e comunidad informacion completo tocante e topico di abuso di mucha y tambe ta duna otro servicio manera charla na diferente scol pa asina siña e muchanan tocante di e topico aki.
E Blue Bingo event lo tuma luga dia 20 di April den Club Caiquetio cuminsando pa 5:30 di atardi. Lo tin 7 wega cu lo wordo hunga riba e anochi di e evento y lo bin bar y cushina bon surti. Tambe, representantenan di Fundacion Respeta Mi ta bay tey pa comparti informacion y tambe contesta algun pregunta. Ticketnan pa e evento lo ta obtenibel na Fundacion Respeta Mi y tambe cerca e studiantenan organisando e evento. Tambe por yama 592 5110 of 735 7155.
