Arubaanse Padvindsters Gilde a tene su reunion di evaluacion den cual a revisa e organisacion di e anochinan di informacion cu a tuma luga recientemente, con cosnan a bay, e desaroyonan, kico ta e liñanan grandi cu a mira den e anochinan di informacion cu hendenan a comparti, kico ta pa nan, aspectonan di trabao cu tin cu enfoca riba dje.
Segun presidente di APG, Grace Maduro, awor aki ta bay traha riba un documento cu ta bay trece dilanti tur e puntonan cu a presenta durante di e anochinan di informacion y ta bay entrega esaki na Gobierno.
Loke por a mira of tende ta cu mayornan mester ta envolvi den educacion di nan yiunan y pa esey ta bay haci un intento pa acerca doñonan di trabao pa trece e informacion na pia di trabao. Tambe ta sigui enfoca pa percura pa e sistema aki di bisa “no”, pa ta implementa na tur scol basico na Aruba. E ta un necesidad masha importante.
Maduro a splica cu tin otro sorto di abuso tambe di mucha cu ta bin dilanti, cu ta trata den e metodo. Loke a resalta mas hopi, ta cu e asunto di abuso no ta un cos cu ta para riba su mes aworaki. E ta core un liña cora den nos cultura y ta bay bek na generacionnan. Semper a pensa cu ta deal bon cun’e. Pero esey ta afectando nos hubentud aworaki. Ta yega na un momento cu tin cu bisa cu desde awor aki ta bay anda cu e asunto aki den un otro forma
Personalmente Maduro ta pensa cu e metodo aki mester ta eleva riba un nivel nacional, den cual e ta bay bin den curriculum di tur scol, pasobra e ta e tarea tambe di Gobierno pa percura pa nos yiunan ta cuida. Tin tratadonan internacional cu ta ratifica y cu Aruba tin cu cumpli cu nan. Den esey e derechonan di mucha ta un di nan.
E problema ta cu tin cifra y no tin cifra. E cifranan cu tin di Lissette Gomes Foundation ta alarmante. Maduro personalmente ta bisa cu cada mucha abusa ta uno di mas. Maduro ta encurasha nan pa tuma e paso di papia riba dje, pasobra no papia riba dje, tambe ta hacibo malo. Bo ta yuda bo mes y bo ta yuda otronan. Aunke tin cu bisa, cu e no ta facil.
