Bo tabata sa cu e higra, cu tur su funcionnan, ta un di e organonan mas importante di bo curpa y cu bo no por biba sin higra?
Lever Stichting Aruba ta un “non-profit organization” cu a wordo funda dia 12 di januari 2018. E fundacion ta un iniciativa di su Presidente cu a haya un transplante di higra na aña 2016 y kier comparti su experiencianan pa asina yuda preveni cu ciudadanonan na Aruba mester pasa door di e mesun situacion.
Cansancio cronico, curpa ta grawata, wowo y cuero color geel of barica hincha y dolor, ta algun di e sintomanan cu por indica malesa di higra. Hopi biaha esakinan ta parce sintomanan inocente y nos no ta realisa ni busca pa sa mas.
Lever Stichting Aruba siguientemente lo tin anochinan di informacion den barionan di Aruba den luna di Augustus y September, “Stima bo mes te den bo higra”. Cu e anochinan aki Lever Stichting Aruba ta realisa e meta principal di e fundacion cu ta pa duna informacion na pueblo di Aruba pa asina hisa e conocemento di e funcion di un higra y conscientisa con pa biba mas saludabel y preveni malesanan di higra.
Durante e anochinan di informacion venidero lo tin presentacion di Dokter specialista di higra y tambe pacientnan cu lo duna nan testimonio. Esaki ta e oportunidad pa pueblo di Aruba amplia nan conocemento riba e salud di e higra, ricibi tipnan valioso y tambe scucha storianan di bida real.
Lever Stichting Aruba lo tey pa 4 siman largo na un MFA den bario. E anochi di informacion “Stima bo meste den bo higra”, lo ta di 7-9 pm.
Skema:
Augustus 29 -MFA Santa Cruz
September 5 -MFA Savaneta
September 12 -MFA Noord
September 19 -MFA Paradera
Lever Stichting Aruba ta invita e pueblo di Aruba pa atende e anochi di informacion y asina tin e oportunidad di ricibi mas informacion encuanto e salud di higra y tambe haci uzo di e oportunidad pa haci cualkier pregunta riba esaki.