E tema di UTV/ATV y keuring a lanta cabes. Pa e motibo aki 24ora.com a combersa cu ir. Anko Koopmans, director di DTI, kende a comenta cu prome cu e proyecto di polis a keda publica den corant, ya DTI a cuminsa bira druk. Algun di nan a bin pa keur. Diahuebs tambe por a mira cu a trece hopi di e vehiculonan aki pa keur.
Koopmans a menciona cu riba e dia aki tabata tin mas of menos 80 di e UTV’snan treci pa keur y un 20 di nan a wordo afgekeurd. Esakinan tur ta wordo adapta un tiki aki aya, cu spiel, luz patras, handrem y nan ta pasa e keuring di un auto, pasobra esey nan ta y ta bay di e mesun forma cu ta keur un auto.
Kico ta tene cuenta cun’e
E keuringnan ta bay di e mesun forma cu esnan di vehiculo di 4 wiel. Esey ta nifica cu e ta wordo atend manera un auto cera y mester tin tur rekisitonan manera un auto. Ta p’esey ta pone enfasis riba e spiel na e parti di pasahero, mester tin seatbelts, su portanan, su luznan. Pues tur cos cu un auto tambe tin. Esey ta haci un tiki fastioso, pasobra no ta tur di nan ta bin asina.
Tin cu por ordo cierto cosnan cu nan ta laga afo den e construccion, pasobra cada un ta un gasto. Por mira UTVnan cu no tin por ehempel un handrem. Pero esey ta un rekisito, si bo ta keur’e bao di un UTV, un V of A plaat. Si bo no tin eseynan y e vehiculo no ta full, e ta bay cay bao di un MFV of MFA, categoria di brommer.
E pesonan tambe ta conta, pero por wak cu tin un tipo di brommer cu casi un motor di auto den dje. El a bin DTI como un V, pero e no ta un auto. No por a keur’e manera un auto. A cambi’e pa un MFV ya cu e peso ta halto. Pero esey ta un parti caminda cu ta wak ki categoria cu e por cay aden.
Scheduling
Koopmans ta splica cu den e ultimo simannan, keuringslokaal no ta hayando e cantidad di autonan cu a spera normalmente. Esey tambe ta depende tin biaha riba e momentonan cu KPA ta tene control. Ora cu Polisnan controla, ta haya hopi mas peticion pa keur auto. Ta purba di atende esunnan cu cana kibra y hincanan den e sistema, pero esey ta solamente ora cu no tin hopi trabou.
Doñonan di UTV/ATV
Nan a ripara cu doñonan di e vehiculonan aki ta busca informacion. DTI mes ta tene e liña di comunicacion y informacion habri. Tin algun di nan a sinta cu nan caba, a splica nan y nan tin nan preocupacionnan tambe. Di parti di DTI a splica kico ta tur e rekisitonan cu ta para den ley y riba e puntonan aki no por haci nada, mester cumpli cu nan. “Nos ta traha segun ley, pero si mester tin un manera di comunica cu otro, of papia di kico por ta e pasonan cu nan por haci pa busca un MF na luga di un V of un A. Pa e otro caso tambe ta atende cu DTP, cu ta duna e permiso.
E ta splica cu si ta un sistema di verhuur of tour, DTP tambe mester ta envolvi den e proceso. Aki ta papia di un permiso y tin cu cumpli cu esey tambe. Tin diferente partido envolvi, pero ta purba toch di tin e miho salida cu ta cumpli cu ley y cu ta sigur riba caminda.
Keuring
Un di e rekisitonan di DTI ta cu tur vehiculo cu pidi un keuring, mester tin permiso valido di DTP.
Koopmans a sigui splica cu hopi hende no ta cumpli cu e rekisitonan pa tin un UTV. E ta compronde cu tur procedura tin nan gastonan, y si mester haci ahuste na e vehiculonan, esaki tambe ta gasto adicional.
E propietarionan mester pone un balans entre siguridad y placa. E ta algo cu ta den nan man, y teniendo cuenta cu nomber di e compania. Si ta preocupa pa e compania y e hendenan cu ta haci uzo di e vehiculonan, mester percura cu tur cos ta na ordo.”No por subi caminda cu un vehiculo cu no tin su documentonan di keuring. Y ainda tin hopi vehiculo coriendo rond sin e documento aki di DTI,” ta palabranan di Koopmans.
Cos ta slow
Aworaki ta un temporada basta trankil. Mayoria di hende ta traha via afspraak, aunke cu hopi hende no ta haci esey. Koopmans a remarca cu nan ta mira un 30 pa 40% di vehiculonan cu mester bin keur ta haci esaki. Tin hopi truck tambe riba caminda cu no ta bin keur. Ta mira tambe den e prome tres lunanan, un caida basta di e cantidad compara cu 2018 di truck, taxi y bus cu tampoco no ta bin. Ta yama nan tur y recorda nan riba nan deber pa tin nan vehiculo gekeur door di DTI.
