Un ambiente di trabou saludabel ta keda un preocupacion pa e empleadonan di gobierno. Siman pasa un biaha mas e polisnan a pidi atencion pa e situacion di schimmel den e wardanan di polis na Oranjestad y San Nicolas. E ambtenaarnan, e sirbidonan di pueblo ta bira malo door dje situacionnan inadecua y no saludabel na pia di trabou.
Un ehempel conoci ta e cuater polisnan cu ta sufri di e mesun tipo di cancer door di e schimmel den warda di polis den Wilhelminastraat. Lastimamente, prome cu mi por a publica e comunicado aki, a notifica mi di e fayecimento di nos colega Rigoberto Tromp. Rigo ta un di e cuater polisnan cu a sufri di cancer ocasiona door di schimmel. Rigo tabata un colega ehemplar, sirbiendo pueblo di Aruba pa 40 aña. Hasta durante su enfermedad Rigo a traha pa comunidad. Condolencia na famia, e sernan keri y e coleganan di Rigoberto.
E ambtenaarnan mester duna un servicio optimal na pueblo y pa logra esaki e ambtenaar merece pa nan salud wordo cuida mas tanto posibel. E hefenan di departamento mester pone atencion na esaki. E mandatarionan, nan tarea ta pa sostene cu loke ta posibel y na unda e ta necesario. Siman pasa Terry Gumbs y mi persona a reuni cu Oscar Garcia di Jesed Enterprises, un compania Arubiano. Nos a ricibi informacion, presentacion y demostracion di ActivePure technology, cu ta un solucion diseña pa NASA, pa cu cualkier contaminacion di aire den un edificio.
ActivePure ta purifica e aire di virus, bacteria y otro contaminacion dentro di algun minuut. A trece e tecnologia aki na atencion di varios mandatario pa nan evalua si e ta algo cu nan por uza den nan departamentonan.
