Alvin Molina (MEP): Sentimento mixto pa nombracion di altocomisario nobo

Otro siman Cuerpo Policial di Aruba lo conoce su hefe nobo. “Di un banda ta un lastima cu atrobe a haya necesario pa busca un hende di afo pa lidera KPA. Dimes cu nos lo desea pa tin nos hendenan local na timon di nos departamentonan gubernamental. Pa un of otro motibo e ‘selectiecommissie’ cu tabata encarga pa busca nos siguiente altocomisario no a logra haya e persona capacita na Aruba mes. Di otro banda esaki ta un oportunidad pa reenforsa e scarsedad na lider cu tin den top di KPA”, asina parlamentario di e fraccion di MEP, esta ex-altoinspector Alvin Molina, a vocifera.

“Pa tres aña Hulanda lo aporta cu un ‘korpschef’ y algun miembro di staf. Sigur algo positivo cu e landspakket ta provee. Loke ta mas cu claro ta cu KPA tin mester di un mando policial fuerte pa yuda nos cuerpo progresa, pa evita cu e barco cu ya caba ta rand rand di awa disparce por completo. Danki Dios, nos ta bendiciona cu polisnan y cu ‘burgerpersoneel’ cu te ainda tin e pasion pa nan trabou y e gana di sirbi pueblo di Aruba. Te ainda nos por gosa di un bida relativamente safe y nos por mercadea Aruba como un destinacion sigur pa nos turistanan. Pero nos no mester tuma e siguridad ey ‘for granted’. E ta algo hopi debil y como pais nos ta ripara cu lastimamente tin hopi cos ta pasando cu nos no por acepta”, asina e miembro di Parlamento a expresa.

Ramon Arnhem tin un 2nd degree connection y tabata e di dos districtchef di polis na Ijsselland, Hulanda. Ijsselland ta un luga varia den provincia di Overijssel, di cual tin estado di Zwolle, Deventer, Kampen, Steenwijk, Ommen y Staphorst. Arnhem tin mas di dies aña den cuerpo di polis di Hulanda. Den henter aparato di polis na Hulanda, e ta un di e poco homber di color den posicion di liderazgo strategico. Den su funcion e ta lidera un ekipo di 750 polis trahando den diferente warda, pa cuida un poblacion di alrededor di 500 mil habitante. Den su tempo liber e ta un boxdo. Pues, e sa con pa tira un bon mokete!

Na final el a bisa cu “Pa por recupera e sentimento di siguridad, ta sumamente importante pa keda inverti den comunidad en general pero sigur tambe den nos departamentonan cu ta percura pa e siguridad. Ramon Arnhem tin su educacion y su experencia como hefe di polis na Hulanda. E no conoce nos organisacionnan tampoco nos cultura cu sigur lo trece su retonan pe. Esaki por significa si cu e tin un bista imparcial y limpi cu por yud’e mira e bigger picture y formula un vision out of the box“.

Alvin Molina ta naci na Aruba y tin 46 aña di edad. El a studia na Colegio Arubano VWO, a sigui pa su estudio na Nederlandse Politie Academie na Appeldoorn y a regresa Aruba pa bira inspector di polis. Entretanto el a cumpli 19 aña como polis, semper den un posicion di maneho y strategia. Den su prome salida den politica e tabata #10 riba lista di partido MEP. Den eleccion na juni ultimo el a logra no menos di 257 voto riba su nomber. Cu salida di Chris Romero for di lista, a bin espacio pa un politico nobo cu e conviccion pa trece cambio y di ta un bos pa e barionan pariba di brug. 

Sigur mi lo invit’e pronto pa e presenta su vision na Parlamento di Aruba. Nan kiermen e parce e actor Idris Elba. Wel, si e bira mesun exitoso cu su dubbelganger, sigur nos lo por gradici’e pa su ‘input’ aki tres aña.”

Noticia relacionaMas for di e autor