Dialuna atardi Arubaanse Voetbal Bond (AVB) a organisa un evento di celebracion p’e Seleccion Girls U15. Aki a conta cu presencia di famia, minister di deporte y directiva di AVB mes. AVB ta orguyoso dje resultado, pero tambe dje desaroyo di cada un hungado.
Mildred Wever, hefe di delegacion di AVB, ta haya e resultado uno tremendo, aunke nan a spera di yega leu manera bira campeon. Nan ta contento cu e resultado. Seleccion di Aruba a cay den un grupo pisa cu tabata liga B, aunke originalmente nan tabata liga C. A bay contra un pais manera Honduras cu hopi habitante y a gana nan. A hunga e di dos wega y gana Bahamas, empata e di tres wega contra Virgin Island. Nan a clasifica como e prome di poule y a bataya te yega final.
Pa loke ta e grupo aki, nan ta bay sigui hunto pa U17. Awo ta bay crea un otro grupo di U14 cu mester hunga otro aña den Caribbean Football Union (CFU). Ta bay recluta mucha nobo, aunke tin par di nan ta jong y awo nan ta e motor cu lo mester carga e chikitinnan otro aña.
Minister di Deporte y Enseñansa, Endy Croes, a hiba palabra y a bisa e damitanan cu nan tin un medaya cu nunca mas por kita fo’i nan. Pa loke ta e staff di coach a dedica hopi tempo pa guia e futbolistanan akinan desde U14 y awo den U15, pero ta anhela cu esey por sigui ora bin cu e otro categorianan cu ta na caminda y cu e team aki por keda hunto.
Dyane Wiersma, manager di Seleccion U15, a splica di a cuminsa cu e prome academia di damas y e muchanan muhe aki a forma parti dje grupo aki. Por mira cu nan a desaroya hopi. Loke a yuda hopi ta cu a join competencia di mucha homber y esey a yuda nan bira mas lihe. E union cu nan tin entre nan ta haci cu unda nan ta, nan ta bataya.
Segun Wiersma, nan a bringa tur cu tin riba e veld. Tabata hopi calor, e clima a hunga un rol riba nan. A hunga contra team cu no tabata nan categoria, e tabata un reto. Esey ta loke AVB tabata kier tambe. E competencia aki tabata un bon momento pa mira unda nan ta para cu futbol di damas.
Pa mas lesa TREMPAN.COM.
