Durante aña mi a reuni cu varios agricultor cu tin e deseo pa aporta na un pilar nobo pa nos economia. Di mes, e agricultornan tin un meta comercial pa nan proyecto, pero loke a resalta cerca cada un cu mi a cera conoci ta e deseo pa Aruba mes por provee mas tanto posibel su mesun berdura y fruta pa asina: 1) Logra un miho calidad, 2) Pa un miho prijs y 3) E siguransa cu tin suficiente berdura y fruta pa nos ciudadanonan.
Un ehempel bunita di esaki ta STR Farm na Alto Vista. Banda di e tres puntonan menciona, nan a construi un edificio na e farm cu ta destina pa ta un scol pa educa specialmente e mucha- y hobennan riba e tereno di agricultura. Propietario di STR Farm ta haci esaki completamente gratis ‘free of charge’ p’e alumnonan pa motiva nan construi den e industria aki. Recientemente, STR Farm a haci un bunita gesto na SABA y na Imeldahof door di regala un cantidad di concomber cosecha aki na Aruba mes.
E clientenan di SABA y Imeldahof no sa haya concomber pa come, pasobra e ta un berdura relativamente costoso. Tanto SABA y Imeldahof a keda hopi contento cu e gesto. STR Farm lo sondea e posibilidad pa sigui provee e berdura aki pa e clientenan gosa di dje. Ta conoci cu tin mas agricultor cu sa duna bek na comunidad.
Pa e agricultornan por eleva e servicio cu nan ta duna na pueblo di Aruba, e agricultornan tambe mester ricibi cierto nivel di servicio. Di parti di gobierno, Santa Rosa tin un tarea hopi importante den esaki. Santa Rosa mester bira e autoridad central pa e desaroyo di Sector Primario. E “network” di Santa Rosa mester ta asina solido cu tur e stakeholders, e.o. United Farmers Aruba, Aduana, WEB, comercio, DIMAS y DIP sa precies na ki manera nan por contribui pa asina eleva nos Sector Primario y ta motiva pa hacie. Mi lo sigui enfoca riba esaki pa hunto nos logr’e.
