Instituto Coreccional Aruba (KIA) ta den un alerta total pa e sospechoso di asesinato, Ryson Paskel, cu lo kier huy for di prizon. Algun siman durante cu e tabata fugitivo el a haya tur chens di huy, pero no a haci’e. Pero awor den KIA tin informacion clave cu ta sigura cu e tin intencion di huy for di e prizon. Pesey tur wowo di esunnan encarga cu siguridad ta riba Ryson Paskel.
Cera den cel ta dificil pa e huy pero ora di lucht si mester tene masha na bista. Di mes na KIA falta personal. Awor ta haya e situacion caminda mester pone atencion constant riba un solo preso pa motibo di su intencionnan.
Ryson Paskel ta cera awor aki pendiente e caso penal, den cual ta acus’e di lo a hinca un otro hoben banda di Hot Zone cu consecuencia fatal. El a sconde basta tempo prome cu a logra gar’e den un persecusion na pia den Santa Cruz. Un tiki mas el a logra scapa tambe pasobra el a core bay laga Polis leu.
Ryson Paskel tabata cera na Warda di Polis na Shaba durante 9 dia largo. Despues di esey a traslad’e pa KIA. Ey ta scuchando diferente version relaciona cu status di su salud y di un enfermedad cu e tin. Awor cu e ta den KIA nan tin extra atencion pe.
