POR: Reforma fiscal lo beneficia docentenan

“Despues cu nos por a wak con gobierno actual a presenta e reforma fiscal unda cu un total di 30 mil hende no lo paga loonbelasting mas, specialmente esunnan mas vulnerabel den comunidad, mesora a surgi e pregunta con ta para cu e clase medio, con ta para cu nos profesionalnan cu a sacrifica parti di nan bida pa logra un titulo mane por ehempel nos cuerpo di docentenan”, asina Anchelino Vrolijk di Partido POR a duna di conoce den un comunicado di prensa. Hopi kier sa ta cuanto e docente lo mester entrega of lo conoce un alivio y bay dilanti den nan entrada.

E politico/docente di Partido POR a sigura cu e docentenan y profesionalnan den otro profesionnan lo conoce un rebaho den nan loonbelasting. Unda cu p.e. un docente cu un entrada anual di rond di 90,000 lo paga 1,622 florin menos na loon belasting. Su loon belasting lo baha di 13,489 (2018) pa un suma di 11,867 (2019).  

Ademas esunnan cu ta traha den gobierno y docentenan lo conoce un aumento den bashi premie, back to school premie y tambe den nan gelijk bedrag.

Cu esaki e lo trece un alivio den hopi hogar unda cu por mira un adelanto den e cantidad di placa cu ta cobra den nan man fin di januari awo caba.  

Anchelino Vrolijk ta un docente na Abraham de Veerschool y na Avond HAVO. Den ultimo eleccion na aña 2017 el a aparece riba lista di Partido POR na # 20 y a logra no mas di 22 voto den su prome salida.

“Y esaki ta unicamente e prome fase di e reforma fiscal, unda cu sigur ta trece un alivio den hopi hogar aki na Aruba”, di acuerdo cu Anchelino Vrolijk di Partido POR.

Comments

comments