Diamars Alan Howell den su calidad di Vice Presidente di Parlamento tabatin e honor di ta presente na Ibero High School unda un Arubiano cu a resalta internacionalmente, dr. Edward Cheung a tene un discurso motivacional na e studiantenan. Pa Alan Howell, como persona cu semper a para pa Aruba en general y specialmente pa Pariba di Brug, tabata un placer di por a comparti y scucha discurso di e Arubiano aki cu a lanta den e bario di Esso Ville na San Nicolas.
Despues cu dr. Cheung a caba Colegio Arubano, el a continua su estudionan na Merca y a haya un oportunidad unico di bay traha na NASA unda cu e tin mas cu 20 aña trahando. Loke a resalta masha hopi mes di dr. Cheung y cu a wordo treci tambe den e discurso ta cu unda cu e bay y durante su trabou, semper e tin e bandera di Aruba cune.
Vice Presidente di Parlamento a expresa cu ta un honor pe di por a topa y duna un di su ‘role modelnan’ Dr. Edward Cheung un “strong handshake”. E ta bisa cu e ta un di su ehempelnan pa sigui debi na loke e ta simbolisa…nada ta imposibel! “Si bo traha duro na scol. Si bo traha duro den bida y si bo meta ta bon fiha, bo ta logra loke bo ta pone bo dilanti!”
E discurso di dr. Cheung tabata yena cu motivacion y Alan Howell ta sigur cu no un, sino mayoria di e studiantenan presente a sinti y biba e motivacion aki pa bay dilanti y logranan metanan, independendiente di kico nan ta…y nunca por sa, por ta entre nan lo tin un siguiente Arubiano cu lo traha na NASA despues di a scucha for di dr. Edward Cheung kico su logronan y su trabounan na e agencia espacial di Merca ta encera.
Alan Howell ta un Polis di profesion. A aña 2013 el a participa den eleccion Parlamentario riba lista di Partido AVP. El a ocupa e puesto number 27 riba lista y a logra 422 voto. El a traha pa hopi aña como coordinador di Minister Ing. Mike de Meza. Na aña 2017 el a scoge un rumbo nobo y a uni na Partido POR y eynan a haya number 5 riba lista. E cambio a resulta bon pe, pasobra el a logra 461 voto, cu a haci’e e di cuater candidato cu mas voto riba e lista, apenas 36 voto so menos di Marisol Lopez cu a sinta dos periodo como Minister y un periodo como Presidente di Parlamento di Aruba.
