Alan Howell: Imsan na San Nicolas ta marca historia

1110

Parlamentario di POR, Alan Howell a mustra su satisfaccion y orguyo ora Minister di Salubridad, Dangui Oduber a confirme cu e prome  bestraling (radio terapia) realisa na Imsan diaranson tabata un exito. E tratamento aki cu a wordo haci pa prome biaha a wordo realisa cu ekiponan ultra moderno y ta un ventaha grandi pa nos hendenan y tambe AZV.

Howell ta indica cu contando cu e ekiponan aki na nos propio isla, nos ciudadanonan cu tin mester di dje no tin cu bay den exterior pa haya e tratamento, haciendo e proceso aki uno mas comfortable pa e pashent como tambe pa su familiarnan.

Ademas e gastonan di AZV ta wordo reduci mirando cu no mester manda hende afo mas pa realisa e tratamento. Esaki sin conta cu tambe lo por ofrece e tratamento na pashentnan for di otro paisnan. Como habitante di San Nicolas, Alan Howell ta mira e desaroyo aki cu wowonan hopi positivo, no solamente e ta un avance medico pa henter nos isla, pero tambe e ta un forma cu lo por trece movecion na San Nicolas. “Masha pabien na e visionario Dr.Joel Rajnherc y full team di Imsan Aruba, partners di Miami Cancer Institute y Baptist Hospital. Un danki special na minister Dangui Oduber”.