Recientemente a tuma luga e evento di Routes Americas 2024. Claro, durante e evento aki, Aruba tabata bon representa cu representantenan di Aruba Airport Authority y Aruba Tourism Authority. Director di Headlines Group, Mark-Benson Denz a combera cu Jordan Schlipken-Croes kende ta director di e area LATAM di ATA riba e echo cu a mira cu AAA a otorga un token di aprecio n’e aerolinea Wingo.
Croes ta di opinion cu Wingo ta un aerolinea sumamente importante pa ATA y AAA y claro pa Aruba. E ta un aerolinea fuerte den e area Colombia pero ta un aerolinea cu ta kere hopi den e producto Aruba. Claro, ora tin aerolinea asina entusiasma cu nos producto, ta motibo pa reconoce y aprecia nan. Wingo na 2019 tabatin apenas dos pa tres frecuencia riba e ruta di Bogota-Aruba, awendia ta conta cu vuelo pa no solamente pa Bogota sino Medellin y hasta Cali. Den periodo di aña hasta ta conta cu un total di diesun frecuencia pa siman. Aumenta ta un parti pero mantene e relacion cu e aerolinea y e frecuencia.
Jorge H. Jimenez ta vice-presidente di e seccion comercial di Wingo, el a conta director di 24ora.com cu e operacion di Bogota, Medellin y Cali ta haci nan e aerolinea mas fuerte pa cu e area Colombiano pa cu Aruba. Nan ta satisfecho y no ta nenga posibilidad crecemento mas aun. Aruba ta bon promociona y un tremendo producto, for di su lama top pero cu restaurantnan unico. Ki mas bunita pa combina e factornan ey cu un bon prijs p’e Colombianonan bula directo pa Aruba. Nan ta sigura cu yena nan avion pa cu e isla mas bunita di mundo.
Fernando Leon Castellanos ta director di planificacion. El a conta cu planifica ta algo importante, ora a mira cu numbernan a cuminsa crece a gara e señal y sigui crece. A conecta otro ciudad via Aruba tambe. Locual a hiba Wingo na un exito ta e expectativa cu a surpasa, e relacion cu AAA tabata sumamente importante. Un bon relacion tambe ta un factor di cifra halto. Ora mira otro aerolinea, ta escasez di piloto, di otro banda Wingo ta enfoca riba rutanan cu ta duna resultado, cual Aruba t’esun top sigur cu si. Pa futuro, tin den mente caba pa crece pa otro destinacion, no por menciona ainda cua origen pero e plan t’ey.
Mary Joan Wardlaw ta Customer Relationship Officer di Aruba Airport Authority, el a conta cu AAA tin bintiocho aña ta participa den e Routes Americas 2024. Riba e echo cu a otorga Wingo e token di aprecio, Wardlaw a conta cu a cuminsa cu Wingo como un proyecto piloto door di yuda nan promove e rutanan n’e audiencia local. E campaña a funciona sumamente bon, pues e vuelonan ta yega yen y nos localnan tambe ta bula pa Colombia, yenando nan avion completo. E campaña a encera pa traha hunto cu prensa local, entre otro 24ora.com y Enfoke.
Recientemente hasta a rifa ticket den e Enfoke San Nicolas Edition, cual a ricibi un bon reaccion. Por spera mas di tipo di campañanan asina durante aña. Lo sigui cu campaña asina cu entre otro e aerolinea LATAM pa Peru.
