Manera conoci recientemente Secretario di Estado Alexandra van Huffelen tabata na Aruba y lo ta bishitando e otro islanan den Reino e dianan aki. Nos a puntra minister plenipotenciario di Aruba na Hulanda, mr. Ady Thijsen riba con ta para cu e Rijkswet y temanan cu ainda ta pega, unda por ehempel sra. Van Huffelen ainda no kier papia di kwijtschelding manera nos a raporta algun dia pasa. Por a compronde tambe cu ainda e negociacionnan no ta stabiel pero nan ta andando.
Segun Thijsen, nan tin contacto cu e ministerio y conseheronan cu ta hopi importante den e proceso aki y tur cos ta bayendo bon. “Nos ta papiando cu otro. Nos tin cierto diferencia di opinion, y mi ta bisa bo cu poco poco bo ta wak cu den esaki nos ta yegando na cierto solucionnan cu te awo ami ta wak positivo, pasobra si no e cos a caba caba,” segun Thijsen.
E mandatario ta afirma cu nan ta papiando cu otro y den e proceso aki semper e ta dificil pasobra ta decisionnan cu tin cu tuma, anto bo mester ta cauteloso. Ora bo tuma decision ta cla. Thijsen ta contento cu e secretario di estado, y ta bisa cu e tin confiansa den dje y den nos minister-president cu nan ta yegando na otro y papiando cu otro. “Mi mes a tende esey di cierto funcionarionan, y mi por bisa bo cu mi tin e confiansa cu nos ta yegando na un solucion.”
No tin un fecha cu ta premira un solucion, y den e mundo aki, segun Thijsen no por papia di fecha nunca. Den hopi di e casonan aki no por bisa cu ta tal dia lo yega na algo. “Bo tin cu corda si cu tin formacion andando di gobierno nobo na Hulanda. Aworaki bo tin un secretario di estado cu ta demisionario, e ta haciendo su trabao, uno cu el a cuminsa y mi ta kere e kier caba cu ne tambe anto den esey mi ta kere cu kisas por yega prome cu e formacion bin. Pero nos ta wak.” Thijsen ta expresa cu esaki ta esfuersonan haci y boluntad politico t’ey na cada banda y por ta lo yega mas lihe cu tur hende ta kere.
