Organisacion Caballista Arubano (OCA) ta tene nan prome competencia pa aña 2024, Feria Himno & Bandera. Diasabra 23 di maart e competencia ta cuminsa pa 6:00 pm. Ta cuminsa cu competencia di cabay di Paso Fino, Trocha, Trocha & Galope, y Trote & Galope.
E anochi aki lo mira un Gran Campeona di Paso Fino nobo, mirando cu e dos ultimo Gran Campeonas no lo ta participando, habriendo caminda pa un otro yegua corona cu e titulo maximo. Tambe lo mira e debut di diferente cabay.
Diadomingo 24 di maart pa 4:00 pm ta bay tin competencia pa jinete y amazona, caminda e muchanan di Aruba lo demostra nan habilidad den e arte di equitacion. Akinan tambe den categoria principiante lo tin amazona nobo cu ta competi.
Competencia lo tuma luga na Villa Floralina situa na Moko, entrada ta gratis cu un bon bar y cushina. E Feria lo ta husga pa e huesnan Maria Consuelo Villamizar di Colombia y Juan Zuleta di Aruba.
