Cu urgencia a mobilisa diferente unidad policial den oranan di diaranson mainta pa merdia den cayanan di Oranjestad. E motibo ta cu un persona canando cu arma, no tabata conoci e momento ey si tabata trata di arma blanco of candela.
Polis a ricibi informacion cu tabatin problema den caya cu adicto y hende arma cu candela blanco, esta cuchiu. Adictonan kier a bringa cu otro y e problema a bira uno serio. Di biaha unidad policial a pasa den Caya Grandi pa mira si ta haya e personanan. Den Caya Betico Croes na altura di Dufry a bin topa cu un persona señala di ta cana arma.
Di biaha polisnan a bay over na detene y pone plat na tera. Polisnan a mira cu e tabatin un tas cu ne y a cuminsa listra den esaki. Den e tas nan a bin haya un cuchiu manera señala. Mesora e agentenan policial a detene e homber y a pidi pa transportwagen. Na yegada di e transportwagen, a transport’e pa warda di polis.
Informacion duna ta bisa cu e homber aki tin problema cu un otro adicto, p’esey e kier a hinc’e. Otro adictonan cu tabata eynan a lanta contra dje y di eynan a surgi problema grandi. Un señora cu a mira tur cos tabata yen di nervio, p’esey polisnan a purba trankilis’e na e momento ey. No ta conoci si e tin lasonan cu e detenido.
