“Oplichting, valsheid in geschrifte, witwassen en misbruik van functie”, esaki ta e acusacionnan oficial cu Landsrecherche a presenta cu ne na man, na momento di e “inval” na cas di ex-Minister Chris Romero. A duna e investigacion e nomber “Kwihi”, den cual ya ta papia aki di tres sospechoso. Separa di Romero, husticia ta tras di ex-Minister Eddie Briesen y e consehero Eumar Koolman. Fiscal ta sospecha cu e trio aki a enrikece nan mes cu plac’i pueblo!
A scoge abogado caba
Entretanto, aunke tin masha poco informacion, ya Eumar Koolman a apunta mr. Vito Carlo como su abogado. Na mes momento, ex-Minister Chris Romero no a keda man crusa y a pidi su amigo mr. Demis Illes pa defende como su abogado. No ta conoci ainda ken ex-Minister Eddie Briesen a scoge pa defende den corte.
Investigacion “Kwihi”
Mucho informacion ainda no tin riba e investigacion mes, pero tur cos lo ta draai rond di Dienst Verlening Overeenkomst (DVO) cu Minister Chris Romero a firma pa su mes, pa su conseheronan y nan famia. Claro, na momento cu Ursell Arends a asumi e funcion di minister y a tuma e ministerio over for di Chris Romero, el a bin topa cu poco sorpresa desagradabel. Como Minister di Integridad, el a scoge pa haci lo corecto, esta di entrega un keho oficial na Ministerio Publico. Ta menciona cu e contractnan aki, por lo menos algun di nan, ta firma na LVV Santa Rosa, pues no ta algo cu e mandatario lo topa cu ne mesora.
A lanta un Uitzendbureau den Cocolishi
Locual Ministerio Publico ta investiga awor, ta e forma con, aparentemente di forma structura, tabata emplea “spook ambtenaren”, cu de facto no ta presenta ni traha, pero cu ta cobra un suma masha halto na salario. Aparentemente Eumar Koolman tabatin un compania cu tabata presta su mes pa emplea e trahadonan aki cu ta “supose” di traha na e ministerio di ex-minister Chris Romero. Pues, Gabinete Wever-Croes I tabata firma un contract cu e compania di Koolman, cu na su turno tabata emplea e coordinadornan, paga nan impuestonan, etc. y probablemente resta poco ganashi p’e tambe. Pa mas facil, Koolman tabata fungi, den cierto sentido, como un “uitzendbureau” pa varios trahado na e ministerio. Pero e investigacion ta mustra awo cu no ta solamente na e ministerio, sino na LVV Santa Rosa tambe!
Tur decision a bay Ministerraad
Ta parce cu e dos ex-ministernan, awor sospechosonan di husticia, no tin pensa di keda boca keto den e caso aki. Ainda ningun di dos a sali duna cara pa e acusacionnan cu nan “mesun gobierno” a entama contra nan. Por lo menos un di nan a confia su amigo cu e no por kere kico ta pasando cu ne. E ta bisa esaki, pasobra, tur decision di nombracion y contractnan DVO, a pasa den reunionnan di Conseho di Minister. Como tal, tur minister tabata na altura di e nombracionnan aki, e tempo aya. Awor cu nan kier hunga manera “mi no sa di nada” dilanti nan partner di Raiz, ta algo cu ta sorprende e ex-ministernan. Nan no ta di acuerdo cu diripiente MEP ta permiti Raiz pa pone Romero y Briesen riba mesa di sacrificio, investigando nan penalmente pa decisionnan cu a tuma hunto, pues cu sigur Eveyn Wever, Dangui Oduber, Glenbert Croes y Xiomara Maduro tabata bon na altura di tur y cu nan tambe a firma cantidad di DVO pa “nan” hendenan.
Un sospechoso por sigui conseha?
Ex-Minister Eddie Briesen, pa por a yuda su mes y su yiu, a comete un eror grave cu awor, na final di su carera, por trece un mancha masha mahos riba su imagen. Ya caba tin un mancha colga di hopi aña caba, ora cu el a firma un “deal” cu un compania Mericano sin conseho di ATA e tempo aya, sin presupuesto y sin cana e caminda corecto. Como cu e ta responsabel personalmente awor pa un demanda di mas o menos dos miyon florin, ta purba di tur forma pa pasa un ley den Parlamento di Aruba pa exoner’e di e debe. Pero, cu e acusacion nobo aki, MEP lo por conta cu e sosten di RAIZ den dicho reunion? Pasobra sin e dos votonan di RAIZ, dificilmente e ley aki lo carga sosten di mayoria y consecuentemente e lo no pasa.
Pero e pregunta cardinal awor ta si ing. Eddie Briesen lo por sigui den e diferente rolnan cu e ta ocupa den Gabinete Wever-Croes II. For di e fraccion di RAIZ den Parlamento ya a sali señalnan den cual ta puntra pa sa mas kico lo pasa cu Briesen awor. Pues di un banda RAIZ a start e investigacion, pero ta “follow-up” tambe riba e consecuencia cu ainda no a bin pa e consehero principal di minister-president y di Minister di Energia.
E ta confirma: Briesen ta sospechoso
Gobierno mes no kier a kere y a bay tras di palabra di Briesen, kende mesora a bisa cu e no sa di nada y cu ta su yiu husticia lo ta buscando. Como ex-minister, a pensa cu mester por confie. Pero como cu tabata scucha demasiado sonido contrario, Gabinete Wever-Croes II a opta pa manda puntra Procurador General toch, djis pa ta sigur. Y den un carta oficial, e homber na cabes di e aparato hudicial di nos pais a confirma cu Eddie Briesen ta un sospechoso den e caso Kwihi. Es mas, e acusacionnan contra dje no ta mucho diferente di esun di ex-Minister Chris Romero tampoco. Pues, awor e coalicion ta sigur, cu dos ex-minister di un di e partnernan cu ta forma coalicion, ta bou di investigacion penal.
Keto bay tin man riba cabes di Briesen
E reto grandi awor ta pa ambos minister, tanto Evelyn Wever-Croes como su primo Glenbert Croes, pa asumi nan rol y bin afo pa sea defende Eddie Briesen contra Ministerio Publico of mester laga Briesen cay y para su contract como consehero y como presidente di Refineria di Aruba (RdA). E ultimo aki ta pisa hopi, pasobra como president-commissaris, Briesen tin acceso na hopi informacion, negosacion y finansa di nos refineria, di e compania FMSA cu ta cumpra y bende combustibel na Aruba y sin lubida e negosacionnan andando pa sea habri refineria bek of bin cu un planta di “hydrogen” riba e mesun tereno. Pero aunke cu Gabinete Wever-Croes sa y tin confirmacion di husticia cu nan consehero ta un sospechoso, keto bay no a anuncia su retiro y como tal ta opta pa sigui cu ne manera nad’un pasa!
Politicamente: Raiz a laga MEP cay
Bo por mir’e di hopi forma, pero e locual cu tanto Partido MEP a gaba cu ne ultimo, esta integridad, awor ta birando su debilidad. E partido mas chikito den coalicion, Raiz, a start un investigacion, sea consciente of inconsciente, cu awor lo por tin consecuencia grave pa MEP. Imagina si husticia haya ambos ex-minister y actual consehero principal di gobierno como culpabel di e acusacionnan serio cu tin riba mesa contra nan. Ta un sla duro politicamente, cu sin duda lo tin consecuencia den eleccion. MEP a acusa AVP hopi ultimamente, debi na e caso contra ex-Minister Paul Croes y actual parlamentario Benny Sevinger. Ambos tabata meti den un caso di cual ta acusa nan di corupcion. Croes a haya castigo y lo mester bay cera awo, mientras cu Sevinger ta wardando sentencia di hues, aunque fiscal a pidi cinco aña di prizon p’e caba. Cu e caso aki awor, Partido Raiz facilmente por “claim” cu tanto AVP como MEP ta corupto y cu pueblo no por confia nan, dunando e partido cu den ultimo eleccion a logra 5474 voto, mas chens pa crece den e siguiente eleccion.
