Manera e añanan anterior, Quota Club un biaha mas tabata presente n’e paradanan y por a mira nan diadomingo. Durante parada Quota Club ta bende earplug pa asina tanto mucha como hende grandi proteha nan oido. Nan ta haciendo esaki pa hopi aña caba, pasobra nan ta haya importante pa tur persona cuida nan oido.
Ivy Simon, miembro activo di Quota Club, a expresa cu nan a cubri tur parada di mucha, cuminsando di blaas te cu esun di diadomingo ultimo. Nan lo t’ey p’e otro paradanan cu falta, esta e fin di siman aki. Pero nan ta contento di mira e acogida cu tin pa oido.
E miembronan di Quota Club ta cana durante henter e parada pa asina bende earplugs na balor di un florin of dos florin, esaki ta depende esun cu bo gusta. El a splica cu durante e parada por a nota cu e zonido tabata hopi duro y mester a mantene un distancia dje speakernan. Simon a conseha p’e bandanan cuminsa baha un poco e musica, pa baha e decibel, pa motibo cu esey mes ta pone cu hende ta haya problema di oido.
