Un accion grandi a tuma luga, cuminsando den ora di merdia y cu a cada cu por lo menos tres hende deteni te na e momento aki. Diferente unidad, incluyendo departamento di recherche como team di aresto a drenta mondi pariba di Vaderpiet pa asina cuminsa busca pa indocumenta cu a drenta via costa.
Den careda di 1:00 pm tur unidad a rondona e area y a topa cu tres hende den e mondi scondi. No ta descarta cu lo por tin mas hende cu lo a drenta y p’esey e buskeda a continua. Ta trata di un area basta grandi, conoci como Rincon, poco prome cu e molinanan di biento.
Un rato despues unidad di K9 tambe a presenta pa asina cuminsa cu un buskeda pa tanto hende como droga. Mayoria biaha cu tin entrada di hende na costa asina aki, ta lanta sospecho fuerte cu lo por tin droga envolvi. Por a mira presencia di diferente recherche presente pa asina dirigi e accion aki na costa.
Ademas di tur accion riba tera, a tuma nota tambe di presencia di helicopter den aire como e metalshark den awa, pa asina tin un bista completo di cualkier movecion straño riba cualkier superficie. Tambe a menciona durante e transmision e peliger cu un intento asina aki ta trece riba bida di e hendenan aki cu ta riesga pa yega nos isla.
Siman no a ni cera ainda, cu a informa di cuater hende cu a perde nan bida, purbando di drenta. No tin informacion si acaso a haya boto of resto di boto na costa, of si nan tin mas cu un dia scondi den mondi. Tur esaki ta informacion cu lo haya despues di cuerpo policial.
Mientrastanto a transporta tur detenido pa un warda di polis y asina cuminsa cu e investigacion pa despues e proceso di nan deportacion.
