Un accidente cu daño material considerabel pero algo mas peculiar a tuma luga diaranson mainta alrededor di 11.15 na e crusada di Weststraat cu L.G.Smith Blvd.
Un persona na stuur di e pickup Nissan Orion di compania di siguridad lo tabata tin intencion di subi caminda principal saliendo for di e hanchi entre Royal Plaza Mall cu Busstop grandi. E no a tuma nota di un Toyota FJ Cruiser color cora biniendo di pariba, pero asina mes a logra para na tempo.
Na su turno e Cruiser cora maneha pa un polis a haci un maniobra rapido pa evita un choke pero lastimamente no a percata cu di direccion contrario tabata biniendo nada menos cu un truck militar. E impacto tabata fuerte y inevitabel. Afortunadamente ningun persona a resulta herida.
Pero sigur un accidente di rango y masha peculiar entre Compania di Siguridad, Polis y Militar caminda cu na final di a midi forsa, e truck militar lo a keda practicamente intacto.
