Diahuebs mainta Corte den Prome Instancia a dicta sentencia den e caso di accidente fatal riba Watty Vos Boulevard, cu a tuma luga dia 20 di april di 2020, cu a costa bida di e ciudadano Robert Calmes. E anochi di e accidente, e acusado Lysander Hernandez, di 22 aña di edad, tabata core direccion nort ora cu el a pega cu su auto tras di e pickup di e defunto, lagand’e morto atras y tambe e señora di Calmes seriamente herida.
Despues di e accidente, Hernandez a dicidi di bandona e sitio di accidente na pia, sin sikiera a bay mira con esunnan herida den e pickup tabata y si e por a brinda nan prome auxilio!
A trata e caso dia 21 di september ultimo y awe hues a dicta sentencia, hayando e hoben acusado culpabel di stuurmento di auto duro, na momento di e accidente e tabata coriendo riba un velocidad di 122 kilometer pa ora.
Hues a mustra riba diferente factor. A atende e acusado kende inicialmente no a yega na tempo pa scucha e veredicto y aki hues, contrario na exigencia di Ministerio Publico pa duna Hernandez un castigo di prizon di dos aña kitando e tempo cu el a pasa den aresto preventivo, el a dicidi otro.
Aunke fiscal kier a cer’e largo, hues a dicidi cu Lysander Hernandez lo tin cu sinta un castigo di solamente seis luna di prizon. Pues, posiblemente e lo no mester bay KIA mas. E tin un gasto pa paga acumula na 6250 florin.
Hues a cera tratamento di e caso pero ata, algun minuut mas laat, Hernandez a cana drenta, ofrece disculpa cu e ta laat y hues a mustra comprension y a splica e hoben e veredicto cu el a caba di dicta. Notabel ta e echo cu e acusado na momento cu el a scucha hues ripiti su decision, a haci un apelacion na Corte si na luga di un castigo di 6 luna, pa conden’e na trabou na comunidad, ya cu el a caba di haya un trabou y si e tin cu bay cera, e lo perde e oportunidad aki tambe.
Hues a mustra e hoben cu e tin dos siman pa apela e decision di Corte y den e proceso ey su abogado lo por presenta e peticion aki. E hoben despues a bandona edificio di Corte ainda como persona liber loke riba su mes tabata algo straño.
