Cu maximo urgencia a pidi pa autoridad presenta riba Watty Vos Boulevard, poco prome cu e rotonde di Wayaca, pa mas o menos 7:30 pm pa un accidente serio entre un auto y un brommer. Na yegada en berdad polis a constata cu tabatin un motociclista seriamente herida benta na suela y un auto cu a bolter y tabata meymey di caminda.
Riba caminda por a tuma nota mesora di un brommer y su chauffeur tira riba caminda. Na prome instante caba tabata mustra cu e no tabata duna señal di bida. A pidi enbes di un, pa dos ambulance presenta na e sitio, mirando gravedad di e victima.
Tur hende na sitio tabata testigo di e esfuerso grandi, di parti personal di ambulance como esun di polis na sitio pa purba na salba e bida di e hoben aki. Ambos team tabata cambia y practica CPR riba e victima buscando pulso. A haci nan maximo esfuerso y no a give-up ningun momento. Te momento cu a haya un poco pulso, e ora ey a sali cu e hoben den ambulance direccion hospital.
Informacion acumula na e sitio di accidente ta indica cu e vehiculo ta esun cu a perde control, dal den e particion meymey di caminda (berm) y consecuentemente bay bolter, dal den e brommer pa despues pasa riba e victima, pero e informacion oficial ey lo haya despues di e investigacion di polis. Tabata trata di un accidente entre un auto marca BYD color blanco numera A-26625 y un motorcycle marca Suzuki modelo GSX-R 750 numera MFA-2682.
Mester menciona cu den e auto tabatin un chauffeur femenino, cu a resulta herida pero no grave. E tabata compaña pa un menor di edad den auto. A transporta ambos cu ambulance pa hospital. Ambos ta stabiel.
A cera caminda y tur rotonde cu ta conduci na e accidente pa asina facilita e pasada di e ambulance, cu a bay cu maximo urgencia abou. Polis di trafico a presenta como tambe polis tecnico pa haci nan investigacion.
Lastimamente un rato despues a drenta informe cu e hoben no a logra sobrebibi e sla ricibi. Pa 8:22 dokter Darianani a constata morto di e motociclista. Ta trata di Angel Gabriel Senra Chara, naci na Aruba dia 14 di december 2002, pues tin apenas 19 aña di edad. E hoben ta traha na Gen Air na aeropuerto como “passenger handler” y su coleganan ta describie como un bon mucha homber, masha servicial, pret y cu hopi respet. No ta mucho tempo cu el a cuminsa core brommer. Diasabra ultimo caba el a cay cu e vehiculo di motor riba L.G. Smith Boulevard.
Headlines Group, cas editorial di 24ora.com y TREMPAN ta manda palabra di condolencia na famia di e fayecido. Esaki ta di seis morto den e trafico insigur di nos isla.
