Awe mainta a detene Maria Leoncita Arends na su cas na Sero Blanco, relaciona cu e caso di Avestruz, cual ta referi na otorgamento di terenonan di gobierno. Abogado di Arends, esta mr. Doris Canwood, ta asumi cu tin mas sospechoso den e caso aki.
Abogado Canwood a confirma cu su cliente ta inocente den e caso aki. El a sigui informa cu Landsrecherche ta sospecha cu Arends ta envolvi den casonan di soborno, falsificacion (valsheid in geschrifte) y engaño (bedrog). Tambe, e abogado mes no ta kere cu ta trata aki di un persecucion politico. Na e momentonan aki e abogado no tin mas informacion pa divulga y ta prefera di warda pa mas interogacion.
E caso Avestruz
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
Keho di Fundacion Nos ta Aruba
Por lo menos un fundacion, esta Stichting Nos ta Aruba, cu su presidente Jan de Ruijter, a entrega un keho na Procurador General di Aruba, relaciona cu asunto di otorgamento di tereno, riba dia 15 di juni 2017. E tempo ey nan a copia hopi instancia, incluyendo gobierno di Hulanda, kehando cu lo mester tin corupcion na escala grandi cu tereno na Aruba.