Dia 4 di april di 2008, un caso di asesinato cruel a tuma luga na Santa Cruz, unda cu Eugene Lampe di 29 aña, a mata su tata, mama y ruman homber den nan cas na Macuarima. Abogado di Lampe, e tempo ey, esta mr. Chris Lejuez, a splica cu e sospechoso tabata sufri di ‘schizofrenie van het paranoide soort’, esta un un schizophrenia peligroso cu ta pone cu bo por haci daño na bo mes y na otro hende. Pa e motibo ey tambe, el a comete e actonan aki.
Pero kico por a haci cu ne? Si ta pone den prizon of si ta purba di un otro forma, dun’e un yudansa tambe pa e enfermedad mental cu e tin, cu ta peligroso pa comunidad. Hues tin obligacion di proteha comunidad. Aruba no tabata conoce e opcion di TBS den nos codigo penal na aña 2009. Ta te na 2012 el a drenta na vigor, aunke cu te dia di awe no tin un clinica pa brinda cuido profesional na pashentnan cu e reto aki. De facto, den henter Caribe Hulandes no tin un centro asina ainda.
Awor cu e dia yega, cu e mester bandona KIA basa cu el a cumpli cu ⅔ parti di su castigo, awor tur hende ta man na cabes. Abogado Lejuez a bisa cu ainda tin un otro ley cu lo por aplica riba Eugene Lampe, esta e ‘krankzinnige verklaring’. Un persona cu no ta bon, psikiatra por yega na conclusion cu e pashent tin e enfermedad di ‘krankzinnigheid’, por intern’e den un instituto unda e lo haya cuido a base di un declaracion (verklaring) di psikiatra.
Aki na Aruba no tin instituto tampoco pa pone hendenan cu problema asina, manera tabatin antes na Corsou. Hues por dicta cu den KIA por ta un ‘krankzinnig verblijf’ y e persona por keda eynan. Esaki no ta basa riba leynan penal, pero mas bien riba leynan di salud publico. Kisas por aplica e ley aki un biaha mas, unda cu ta proteha comunidad y toch ta tene Eugene Lampe. Pa mas informacion, lesa e edicion di TREMPAN di awe.
