E no tabata sper’e. Elizabeth Paskel-Robles de Medina tabata na cas di su tanta den Rondweg na Dakota, ora cu diripiente e ta scucha sirena di polis pafo di cas. Ora el a sali pafo, a topa cu su coleganan den patruyanan un tras di otro cu zwaailicht y sirena sendi, pa despedi di dje como cu e ta baha cu pensioen awe cu 63 aña di edad.
Su edad, su conocemento y su experiencia a haci cu na dado momento el a haya e imagen di un berdadero “mama” pa e polisnan hoben trahando den e districto di Noord. Durante hopi momento di reto, semper ta acudi na “Lisa” pa un conseho riba kico pa haci miho. Den su tempo liber hopi biaha ta dedica na yuda hobennan bay den bon caminda, yuda mayornan cu nan yiunan den adiccion, pa yuda nan drenta trayecto social, etc.
Lisa Paskel a cuminsa traha den Cuerpo Policial Aruba na aña 1997, despues di regresa for di Hulanda. Ey el a traha pa hopi aña den Cuerpo Policial Amsterdam-Amstelland. Aki na Aruba el a cuminsa traha den e districto di San Nicolas pa varios aña, despues a sigui pa e ekipo di recherchenan cu ta investiga casonan di joyriding y despues a bira “wachtcommandant” na ward’i polis na Noord. Desde cinco aña pasa el a bisa subinspector y a haya e funcion di “Chef van Dienst” y alabes ta un subfiscal pa Ministerio Publico y ta atende cu detenidonan cu yega ward’i polis na Noord.
Comisario Trudy Hasell a bishit’e awe na cas y den nomber di henter Cuerpo Policial a desea Paskel hopi exito den futuro y pa e disfruta di su pensioen bon mereci. Lisa Paskel tin un yiu muhe ainda polis y e mes ta casa di ex-polis defunto Ronny Paskel.
