Fin di aña semper ta druk na Abattoir, vooral e prome dos simannan di December. Segun Rodney Bareño, keurmeester, mayoria bestia ta bin riba dialuna te cu diahuebs.
Hopi di e hendenan ta bin riba cita. Ta purba di coordin’e di tal modo cu no ta keda pega cu e bestianan.Tin hopi bestia berdad, compara cu e lunanan anterior. Ta un tradicion pa Aruba pa fin di aña tin bestia chikito y carni di porco.
Ta purba di schedule. Tin hende cu tin dos of tres bestia, no por schedule nan. Pero tin hende cu tin grupo di 30 pa 40 bestia, unda cu ta purba di plama nan pa e drukte no bira dje hopi ey. Tin comprension toch y semper ta pidi hende ora nan bin, bin cu pasenshi, bin tempran, pasobra e ta un proceso cu ta tarda. No ta un dos tres y bay bek. E ta cana su caminda.
Pasenshi ta e palabra
Pa matamento tin hende cu ta yuda, nan ta loonslachters. Nan ta hendenan cu ta freelance, nan ta bin y ta haci e matamento. Loke cu Abattoir ta haci, ta pa e carni ta saludabel pa come. Keuring prome cu e bestia wordo mata, y e keuring na final e bestia tin cu pase.
E bestianan
Den December ta ripara cu cabrito y carne a cuminsa subi. Pero den full aña e cria di porco ta basta halto. Net den fin di aña e ta pareu.
Te ki dia
Te cu dia 18 di December ta mata bestia. Ta pidi tur hende pa no warda te cu dia 18, pasobra lo ta hopi druk. Bin toch den e siman cu ta drentando pa kit’e for di man.
Criamento ta birando menos
Segun Bareño, un hende cu ta cria dos of tres bestia of esun cu ta cria 50, no ta puntra nan kico e ta. Pero hopi di nan ta bisa cu nan ta bahando nan cria door di tereno cu ta tiki schaars, cuminda ta duro pa yega na dje facil. Ta ripara cu hopi di e criadero ta bahando nan cria di bestia chikito. Pero e tin di haber aparentemente cu tereno.
Keuring
Keurmento ta importante. Aruba ta un isla y ta rondona door di lama. Pero semper por tin malesanan cu por bin di afo. Actualmente na Aruba no tin ningun malesa di bestia, pero toch semper un cabrito of porco, por come algo cu por dune un infeccion paden. Ta importante cu prome cu e matansa si e bestia ta salud y durante e proceso di matansa, por mira si e cambio ta bon pa consumo. E por ta un malesa cu por haci e bestia malo, pero tin malesanan eyfo, cu por afecta un hende tambe.
E ta importante pa e bestia wordo mata na abattoir, pa controla pa wak si e carni ta saludabel pa come.
E bestia ta pone un stempel special. Segun Rodney Bareño, ta keda un tradicion pa trece un bestia pa mata na abattoir. Pero tin hende ta pensa cu mat’e na cas ta mas facil. Pero esaki ta ilegal. Tur bestia cu wordo mata na abattoir ta haya su stempel di goedkeuring.
Esey ta nifica cu e bestia a cana su proceso di inspeccion. Tambe e doño di e bestia ta haya un comprobante cu el a wordo mata eynan.
Si e bestia no tin seyo, ta nifica cu el a wordo mata bao di palo y e riesgo por ta grandi.
Bestianan no saludabel
Bestia ta keda un animal cu no por bisabo cu e ta malo. Ta hende tin cu wak si e ta malo. Tin ora ta haya bestianan cu ta wordo afgekeurd. Sea cu nan tin un infeccion paden, of tin un pia kibra cu por a haya un afgekeurd.Tin parti di e carninan cu no por come, e ta wordo afgekeurd, of full e bestia ta wordo afgekeurd.
Hopi biaha ta mustra e doño tambe riba esaki. Nan tin comprension pa esey.
E bestia ta wordo confisca una bes cu e ta afgekeurd. Nan ta tir’e den baki di dump y ta wordo distrui. Hopi biaha ta tira likido biña riba dje y no por come mas.
E cantidad
Bareño ta calcula cu riba awe diaranson so a mata 100 bestia. A cuminsa pa 1’or di marduga cu e matamento, si no ta mas prome. Tin ora ta cuminsa tempran pa evita e drukte di merdia. Pa un bestia tambe pa 12’or di merdia, no ta bon p’e pa tey den un haula calor. Hopi di e criadornan ta prefera pe trece nan marduga, pasobra ta mas fresco, ta miho pa e bestia y e pa e matadornan e ta mas suave tambe, compara cu 12’or di merdia, den un calor inmenso.
Ekipo
Pa loke ta ekipo, e ta bayendo bon. Ora ta hopi druk, ta pidi pa tin un cita, djis pa den un dia no haya nan mes cu 300 bestia. Ta purba di verplaats’e un manera cu ta kibre durante dia.
E ekipo ta bay. E no ta e miho cu nan tin, pero toch nan ta lora cu loke nan tin. E ta bayendo bon segun keurmeester Rodney Bareño
