Diaranzon anochi pasa di 9or, Polisnan di Noord durante patruya a mira un auto sospechoso. Ta trata di un Spark color blauw moviendo den Rooi Santo. E tabata tin cuater homber aden. Pa ora cu Polis a lora bek pa mira nan drechi, e chauffeur a medio trotlle e auto pa scapa di Polis. Polisnan a logra yega na e auto y na dado momento un pasahero sinta dilanti a habri porta y sali core.
E momento ey ta dos Polis so tabata tin. Un di e Polisnan a bay tras di esun cu a core bay mientras cu tabata pidi refuerzo cu urgencia. Asina varios unidad di Polis a yega rapidamente na e sitio. Mientras cu algun a bin yuda e colega su so na e auto cu tres homber aden, e otronan den auto di Polis y Quad Racer a bay busca drechi di e colega cu a sali core tras di e homber cu a huy.
Nan a topa cune tambe. E polis a core basta pisa tras di e homber bulando di cura pa cura na e casnan cu tin den Rooi Santo. Finalmente a bin topa e homber stranhero sinta den cura di cas sin por a sigui scapa for di Polis. Ora a bay chek y listranan a resulta cu tres ta stranhero sin documento valido. E unico cu tabata tin documento valido y tambe ta stranhero ta e chauffeur. Nan a traha pa un compania di construccion no mucho leu.
Segun e chauffeur, ta un lift el a duna e hombernan. A mustre cu e storia ey ningun hende ta kere y e mes a medio cuminsa smile. Finalmente por bisa cu Polisnan a haci un tremendo trabou diaranzon anochi reaccionnando rapidamente pa reforza e coleganan cu a haya nan den un situacion preta. Tambe por bisa cu bisiñanan tambe a sali tur spanta pa mira kiko ta pasando den nan barrio cu tanto Polis. Finalmente nan por a keda trankil pasobra Polis tabata tin henter e scenario totalmente domina. Na Aruba tin basta illegal y no por confia ningun di nan ora topa cu nan den cualkier area straño y peor anochi. Ora di listra no a topa nada di droga of arma riba nan. Den Dog Catcher a hiba tur tres warda di Shaba pendiente investigacion riba na status legal na Aruba. E chauffeur di e auto por a bandona e sitio despues di e control y scual di Polis.
