Diamars ultimo Hues di Pennsylvania a sentencia Bill Cosby di 3 pa 10 aña den un prizon estatal, cinco luna despues cu a declar’e culpabel di agresion sexual contra un ex empleado di Temple University den su cas na aña 2004. E fiscal di districto di Montgomery a confirma e sentencia riba Twitter. E sentencia ta inclui un multa di 25 mil dollar y ta rekeri pa Cosby paga e costo di su procesamento.
“Ta ora pa tin husticia den Corte di husticia,” Hues Steven T. O’Neil a bisa na final di e caso, asina Philadelphia Inquirer a informa. “E dia a yega. E momento a yega”. Di acuerdo cu varios reportero presente den e sala di Corte, e Hues a rechasa e peticion pa “bail” di Cosby, loke ta nifica cu a laga cer’e mesora. E sentencia di Cosby pa tres acusacion di asalto indecente grave a tuma luga despues cu e victima, Andrea Constand, a bisa cu un homber na cual el a considera un mentor, a drog’e y a agredi’e sexualmente.
Durante tratamento di e caso en Corte, Constand y otro cinco muhenan a testigua cu Cosby a participa den un patronchi similar di comportacion. E defensa di Cosby a nenga e acusacionnan, mescos cu e acusacionnan similar formula contra di dje pa mas di 60 hende muhe. E relacion sexual entre Cosby, awo di 81 aña y Constand, awo di 45 aña, tabata consensual, el a afirma a traves di su abogadonan y un hurado di e Condado di Montgomery cu a scucha e acusacion di Constand na aña 2017 caba, no a logra yega na un veredicto. E caso nobo y e condena di April ultimo, a duna e otro presunto victimanan di Constand y Cosby, e validacion cu nan a busca despues di añanan di duda di su declaracionnan lo wordo scucha of confirma algun biaha.
Un tempo un di e animadornan mas famoso di Merca, Cosby tambe tabata un artista di color den comedia, pelicula y television, alcansando su miho temporada di ocho temporada den The Cosby Show di NBC entre aña 1984 pa 1992, cual carera y reputacion sano a bin abao cu e peso di e acusacionnan den su contra.
El a enfrenta un maximo di 30 aña di prizon, 10 aña pa cada un di su tres sentencianan, pero como cu e audiencia di e sentencia di e dos dianan a cuminsa dialuna, Hues a combina e casonan den uno, segun loke ta permiti pa e ley di Pennsylvania ora cu e infraccionnan a surgi di un solo incidente.
