Tourism Corporation Bonaire (TCB) a participa for di 5 te 7 di maart ultimo na e Bolsa Internacional di Turismo (Internationale Tourismus-Börse – ITB) na Berlin, Alemania. Ta trata di e bolsa B2B mas grandi di Europa, den colaboracion cu e Oficina Hulandes pa Turismo y Congreso (Nederlands Bureau voor Toerisme en Congressen – NBTC). Miles Mercera, director di TCB y Marjolein Oleana, Business Manager & Europe Liaison a duna guia na e representacion di Boneiro na e bolsa di ITB.
Na aña 2023 TCB y NBTC a drenta den un laso di colaboracion, caminda TCB ta haya oportunidad pa colaboracion riba varios tereno cu NBTC. E participacion di Boneiro na diferente bolsa ta forma un parti integral dentro di e colaboracion cu NBTC.
Durante e bolsa e ekipo di TCB a establece contacto intensivo cu operadonan nobo di tour di Alemania y otro partidonan importante den e industria di biahe di Alemania. E meta tabata pa sigui promove y posiciona Boneiro riba e mercado Aleman y realisa colaboracionnan nobo pa e isla.
TCB a pone como meta pa enfoca mas ainda riba e mercado Aleman, Austriaco y Suiso, conoci como e mercado GAS (Germany, Austria, Switzerland). E enfoke ta riba promocion di Boneiro dentro di e mercadonan aki y atrae mas bishitante for di e regionnan aki.
“E bolsa di ITB tabata un exito grandi pa nos team. Yen di confiansa nos ta inicia colaboracionnan nobo pa haci Boneiro mas fuerte na Alemania y su paisnan bisiña”, segun Miles Mercera, director di Tourism Corporation Bonaire.
E ekipo di TCB ta mira bek riba un bolsa di ITB masha exitoso y ta dicidido pa drenta den colaboracionnan nobo, cu lo pone Boneiro den un forma mas fuerte ainda riba mapa dentro di e mercadonan di Alemania.
