A pidi castigo pisa pa atracadonan di Sabana Basora

Jorge Antonio Ramirez; Joander Antonio Alexander Ramirez; Arold Clement Santos Ramirez; Jerleyne Shalenne Dirksz y e menor JARP (16) diabierna mainta tabata den Corte pa e casonan penal contra nan. Ta acusa nan di ta envolvi den un serie di atraco for di 19 di september pa 2 di october 2018, uzando arma di candela y arma blanco, pero tambe, a acusa algun di nan di secuestro, menasa y maltrato.

Ta trata di hobennan di entre 16 y 23 aña di edad, di cual mayoria ta biba den area di Sabana Basora. Un di e acusadonan ta un mucha muhe di 23 aña, kende ta mama di dos yiu, di cual esun mas chikito ta un baby. E atraconan den cual el a participa den nan tabata como chauffeur di auto cu a percura pa su ex pareha y su amigonan bandona e sitio mas rapido posibel. Na momento cu el a haci esey, e tabata na estado. El a bisa cu el a haci esakinan obliga door di su pareha, ya cu e tabatin miedo cu e por cumpli su menasa di da’e.

E atraconan a wordo cometi riba Well Done Truck na Rotonde Las Americas; Ritz na Savaneta; un intento di atraco na Supermercado Tur Dia na Tanki Leendert, unda cu a los un tiro ora cu un Chines a tira nan cu un boter pa spanta nan. Despues di e fracaso ey, riba e mesun dia a tira atraco riba Rowigini’s y Rey Hing Bar Restaurant. Prome cu tur esey, nan a tira un atraco tambe riba Citgo Tanki Leendert, unda cu a bay cu un suma chikito pero a laga e empleado hopi traumatisa cu pa algun tempo e no por a traha mas.

Hasta ora cu nan tabata cera, dos di nan, di cual un o tabata e menor di edad, a drenta cel di un preso na KIA, dal’e mand’e for di tino y a propin’e varios hinca. Tambe e acusadonan, cu excepcion di e menor, a wordo acusa di secuestro di menor, di a menasa y maltrata nan.
Pa tur esaki Fiscal a bisa cu ta trata di delitonan sumamente serio, cu a treci insiguridad den pueblo, a causa daño na nomber di Aruba, y a perhudica varios comerciante y ciudadanonan cu a perde nan cartera cu contenido durante e atraconan.

Apesar cu Joander tabata menor ora cu el a comete dos di e atraconan, Fiscal a pidi Hues pa husge como adulto, mirando e seriedad di e delitonan y e efectonan cu nan tabatin. Pero tambe su actitud cu den e caso aki tabata manera uno di “yo no fui”, mientras cu tur prueba ta contra dje. E tabata esun cu e arma di candela den tur e delitonan cometi.

E castigo maximo pa un serie di atraco manera esaki, pa ley, ta 16 aña, mirando y teniendo cuenta cu e no ta un recidivista a pidi un castigo di 12 aña. Den e caso di Joander, a tene cuenta cu su rol y cu dos di e delitonan cu el a comete tabata ora cu e tabatin 17 aña. P’esey a pidi un castigo di 10 aña. Arold, tabata un di e acusadonan cu a coopera dunando un declaracion concreto for di inicio. Y tur loke cu el a bisa tabata cuadra cu e otro acusado Dirksz a declara. Mirando esaki, a pidi un castigo di 8 aña.

E mucha muher Jerleyne Fiscal a tene cuenta cu e tambe a coopera; a tene cuenta cu e ta mama di dos yiu di cual esun mas chikito ainda e ta dunando pecho. Pero, e delitonan ta demasiado serio pa impone un castigo condicional pa cual a pidi 4 aña incondicional. Den caso di Jorgino, a tene cuenta cu e si ta cay bou di ley hubenil. Y den e ley hubenil e maximo di castigo pa caso di atraco y otro delito cu el a comete ta 4 aña. Pero mirando cu e ta un first offender, a dicidi di pidi 3 aña.

Su abogado mr. Carlos, kende tabata e prome pa hiba palabra, a bisa cu den e casonan di atraco, no por condena su cliente pa motibo cu e acusacion a bini solamente di loke Dirksz a bisa. Pero Dirksz mes no a mir’e, sino el a tende esaki for di su ex pareha of a les’e di whattsapp den su celular di su ex pareha. Hues tabata di acuerdo cun’e, pasobra no tin copia di e mensahenan aki tampoco. Pa e motibo aki a declar’e liber di e acusacionnan di atraco pero di e maltrato den KIA si a keda proba. Pa esaki el a haya un castigo di 240 dia, di cual 37 ta condicional y 2 aña di prueba. Esaki ta nifica cu awe mes e ta sali liber. E otro casonan lo tin sentencia aki tres siman.

Comments

comments