Museo Arquelogico Arubano ta bay tin un exposicion internacional temporario cu yama “Caribbean Ties Aruba”, cu ta bay habri dia 22 di Mei, esta otro siman diaranson, pa cual ta invitando un y tur pa bin e apertura di e exposicion bunita aki, cual tabata un regalo di e proyecto di Nexus 1492.
Suzy Boekhoudt, projectleider di Caribbean Ties Aruba, a splica cu Museo Arqueologico hunto cu Fundacion 1403, Nexus 1492 y Ministerio di Cultura, tin e honor di invita henter pueblo di Aruba pa e apertura di e exposicion temporario internacional, Caribbean Ties Aruba.
Apertura “Caribbean Ties” Aruba
Posted by 24ora on Tuesday, May 14, 2019
E evento aki lo tuma luga dia 22 di Mei, pa 6’or di atardi, cuminsando na museo mes. Caribbean Ties ta e finalisacion di e proyecto di Nexus 1492, cu ta wordo lidera pa Universidad di Leiden. Nexus 1492 ta un investigacion cu a wordo haci pa hopi aña caba den e region di Caribe. Aki a haci investigacion riba indigenanan di Caribe, net prome y despues di e encuentro cu paisnan Europeo. Di esaki a saca e exposicion Caribbean Ties cu ta dunando e ilustre, esta e imagen di con nos a hereda full esaki for di e indigenanan, esta e tradicion, cumindanan y tambe ta papia riba e similaridadnan den e region di Caribe y e diferencianan.
Pa e proyecto aki di Nexus 1492, tabata hopi importante pa Aruba, pasobra Aruba a haya e oportunidad di haci investigacionnan mas profundo y mas intenso. Por corda cu nan a haci e investigacionnan na Santa Cruz 35, cual tabata net patras di e oficina di notario Tromp. Tambe tin sitionan arqueologico cu a wordo investiga mas profundo cu ta na Spaans Lagoen, Canashito y e ultimo sitio di arqueologia cu tin ta Sero Colorado. Pa e anochi aki ta bay tin un presentacion di profesor Corinne Hofman, lider di e proyecto Nexus 1492 y tambe di e hoben Arubiano cu ta traha na Universidad di Leiden, Tibisay Sanksanin-Navas, kende ta coordinador di Caribbean Ties completo. Pueblo di Aruba ta keda invita pa bin e apertura aki, cual ta bay tin e oportunidad tambe pa interactua cu e team di Nexus 1492 y tambe Caribbean Ties.
