Diaranson anochi, ora cu hopi hende tabata pendiente pa mira e di 4 edicion di e programa Bou Palo cu Ivo Yanez pa 10:10pm via Tele Aruba, a sali riba Facebook cu a dicidi di no sigui cu e show mas pa via di presion politico. Parce cu un ciudadano a manda carta pa Minister Presidente protestando contra e programa, den cual ta combersa cu un homosexual. E Premier a contesta e carta sigurando cu e lo tuma paso. Pa evita cu ta yega asina leu, Ivo Yanez mes a dicidi di para e programa y no ta sigui cune mas tampoco!
Riba red social, e conocido presentado a lamenta cu mester a tuma e decision aki pa via di hendenan cu mente chikito. El a cuminsa e show cu Pader Jairo, a sigui pa Cesar Olarte y despues cu Vivian Kock, envolvi den e robo di Glacial den Chines. Ya e dia ey caba Minister Xiomara Ruiz a comenta den forma negativo riba Facebook.
Awor cu a promove e programa cu Julio Andrews, a lanta algun protesta for di ciudadanonan contra e movecion homosexual riba nos isla. A uza influencia politico pa mete den maneho diario di Tele Aruba pa pone presion pa evita transmicion di e programa.
Mester menciona cu probablemente mas hende ta mira e programa via internet y Facebook cu ta mir’e na television mes. Asina mes Ivo Yanez a dicidi diaranson anochi cu e no ta sigui cu e programa mas.
