Hues cu ta trata e caso Ibis, contra Paul Croes (ex-minister di labor) a dicidi di pospone e caso cu lo a tuma luga dia 26 di September benidero. Motibo principal di e desicion di Hues pa pospone e tratamento di e caso, ta cu aparentemente Ministerio Publico no a entrega tur documentonan di e caso IBIS.
E team di defensa di e ex mandatario consistiendo di abogadonan Marije Vaders y Demis Illes a entrega un peticion pa no continua otro siman cu e caso como cu nan no a ricibi tur documento necesario pa por prepara e caso. Hues a bay di acuerdo cu e peticion y a pospone esaki probablemente pa otro luna.
Mester menciona cu no ta prome biaha cu e caso IBIS ta wordo posponi pa falta di documento of cu e investigacion no a termina.
E caso aki ta trata di varios acusacion contra ex-minister Paul Croes kende te cu dia di awe ta para riba su inocencia. Por spera cu e caso mes kisas lo wordo trata den luna di november. En todo caso e reggiezitting planea pa otro siman lo no continua a base di desicion di Hues.
