Awe tardi famia, amigonan, conocinan, votadonan y ex-coleganan di Frido Croes a despedi di dje durante un misa solemne na Misa Papa Juan Pabo II situa na Tanki Leendert. A dera e ex politico na santana catolico di Paradera. Specialmente pa su señora, su yiunan y nietonan, e perdida a laga un tristesa inmenso atras.
Frido Croes tabata parlamentario, vice-presidente y presidente di parlamento, minister di enseñansa y su ultimo funcion tabata Minister Plenipotenciario na Hulanda. Diabierna ultimo a drenta e noticia tristo cu e politico pensiona a fayece, lagando atras su señora Lourdes y su dos yiunan Francis y Joseanny.
Mainta e corteho funebre a pasa na Bestuurskantoor y sede di parlamento di Aruba
Francisco Walfrido “Frido” Croes a nace na Aruba dia 3 di december 1957. Despues di a caba HAVO na Aruba, el sigui studia na IPA pa maestro di scol. El a traha durante un decada largo na Colegio San Jose na Santa Cruz. Entre 1994 y 2001 el a traha na Departamento di Enseñansa.
Mester menciona cu na aña 1988 el a bira miembro di partido Movimiento Electoral di Pueblo (MEP). Entre aña 1989 pa 1994 el a ocupa e puesto di Parlamentario, incluyendo e funcion di Vice-presidente entre 1993-1994. Na aña 2001 el a ocupa e funcion di Presidente di Parlamento. Na aña 2004, ora cu Fredis Refunjol a tuma su retiro como minister pa asumi e funcion di Gobernador, tambe Frido Croes a asumi e funcion di Minister di Enseñansa. Na aña 2005 a nombra Frido Croes como Minister Plenipotenciario di Aruba na Hulanda y a fungi te cu aña 2009 ora cu MEP a perde eleccion y AVP a asumi poder den gobernacion riba nos isla.
