Fiscal na Hues: Toque de Queda no ta legitimo!

Fin di luna di augustus, Gobierno, por medio di crisis-team, a dicidi riba nan mes y sin consulta cu Husticia di nos pais, cu ta impone un Toque de Queda atrobe riba henter comunidad. Riba dia 28 di augustus ultimo, nos a informa comunidad cu mando policial a duna ordo na tur polis pa NO actua riba e ley aki y como tal NO detene ningun hende pa e supuesto delito aki. Un dia despues, Ministerio Publico a confirma e noticia aki, subrayando cu fiscal no ta mira necesidad pa aplica dicho maneho awo. Sinembargo, e mesun merdia ey, despues di un reunion cu Crisis Team y Minister Presidente, e mesun Abogado General di Ministerio Publico a cambia di idea y a core saca un comunicado di prensa, contradiciendo su mes, bisando cu e Toque de Queda ta sigui toch!

Ta for di e momento ey caba por a sinti cu Ministerio Publico no ta actuando di forma liber y a sucumbi pa presion politico. Esey riba su mes ta un desaroyo peligroso y condenabel. Ta e tipo di practicanan asina ta haci necesario pa nos tin un Procurador General na Aruba cu e poder maximo pa por para cualkier Gobierno cu kier trapa derecho di pueblo. Como cu e Abogado General e dia ey no por a sucumbi pa e presion, awe Ministerio Publico a presenta na Corte y a pidi un Hues pa tuma un decision riba e asunto aki.

Ministerio Publico a presenta awe na Corte e pregunta si e Toque di Queda cu a keda impone na augustus ultimo, tin suficiente base legal y por wordo considera legitimo. Ta na Corte pa dicidi si e (di dos) Toque di Queda aki tabata necesario y propocional. Un Toque di Queda ta un medida cu ta limita libertad di e ser humano y cu ta viola derechonan ancla den e Constitucion di Aruba y e Tratado Europeo pa Derechonan Humano (EVRM).

Un condicion importante ora ta impone restriccionnan riba derechonan fundamental ta cu esakinan ta necesario y proporcional. EVRM ta exigi specificamente cu restriccionnan imponi, ta semper respeta e esencia di e derechonan fundamental di e ser humano. Corte Superior di Derechonan Humano ta reconoce si cu estadonan cu ta cay bao EVRM, tin cierto ‘margin of appreciation’ (of espacio pa uza nan mes huicio) ora di tuma medidanan preventivo pa cu proteccion di salud.

E Toque di Queda actual a keda estableci pa medio di un ministeriële regeling riba 28 di augustus 2020. E prome Toque di Queda a wordo, conhuntamente cu varios otro medida, estableci na maart di e aña aki y a dura te fin di mei. Durante e periodo ey tabatin un cantidad di medida: frontera tabata cera, tur horeca tabata cera, tabatin Shelter in Place, scolnan tabata cera y companianan no-esencial tabata cera.

Ministerio Publico ta di opinion cu tabata hustamente e conhunto di tur e medidanan aki cu a haci cu e Toque di Queda tabata legitimo. Corte tabata de acuerdo cu esaki y Hues a considera e prome Toque di Queda legitimo. Sinembargo, ora di establece e Toque di Queda actual na augustus ultimo, no a tuma ningun di e medidanan aki. Frontera a keda habri, hotelnan, restaurantnan y companianan a keda habri y no tin Shelter in Place tampoco. Ministerio Publico a bisa esten, tambe den media, cu e cuestion ta bay ta si e di dos Toque di Queda lo wordo acepta di nobo pa Hues den Corte, considerando e circunstancianan menciona aki riba.

Durante e tratamento di awe y tumando tur cos den consideracion, Ministerio Publico a finalmente yega na e conclusion cu e Toque di Queda actual no ta cumpli cu exigencianan. Ministerio Publico a pidi Hues pa sigui cu ontslag van alle rechtsvervolging* (ovar, exoneracion di persecucion) di e dos sospechosonan cu a wordo hiba dilanti hues pa violacion di e (di dos) Toque di Queda.

Ta tarea di Ministerio Publico pa, a base di Constitucion di Aruba y como parti di poder hudicial, trece pa dilanti dudanan cu por reis relaciona cu ley y reglanan y pa pidi Corte pa huzga. Corte lo dicta riba 5 di november venidero. E ora lo bin mas claridad tocante e Toque di Queda actual.

*Bij ontslag van rechtsvervolging, ovar, heeft een verdachte een bepaald strafbaar feit begaan, maar is het feit of verdachte niet als strafbaar aan te merken.