Ayera polis a detene un homber, sospecha di tabata den Gusto Nightclub y di lo a dal Kevin Wever, yiu di minister-president, cu un boter di cerbes. No ta trata aki di e rumannan Williams, sino di un otro sospechoso, cu ta esun cu lo a tira e boter den e club. Polis a tuma e grabacion den beslag pa por analisa e situacion den e club y asina saca afo kendenan tabatey, kendenan a tira boter y cua di nan a tira mokete riba otro.
Te ainda polis no por a confirma si a detene mas hende den e caso aki y si e yiu di e prome mandatario ta victima of sospechoso tambe. Ta bisa esaki pasobra ambos Kevin Wever como Nigel Williams a entrega keho contra otro. Di otro banda, for di dia di e caso, ora tata di e dos bringadonan a topa cu otro, a conclui caba cu no ta Williams a tira boter, sino un amigo di nan.
Despues di Gusto Night Club, e bringadonan a bay den Azia Restaurant y bolbe topa cu otro. Ey tabatin tiramento di conopi riba otro y den e proceso un coki a resulta levemente herida. Di e dia ey a start cu un investigacion cu awo a cuminsa haya forma y detencionnan a cuminsa cay. Kico ta motibo di e pelea no ta mucho bon conoci. Tata di Williams a bisa cu Kevin Wever lo a scupi riba su yiu y a insult’e. Wever ta desmenti esaki y ta insisti cu e cos a bay net lo contrario.
Fuentenan a sigura na nos cu e parti e caso den dos. E prome parti ta e tiramento cu boter den Gusto y e di dos ta e bringamento den Azia Restaurant. Tur cos ta mustra cu e caso di Azia lo no bira nada y ainda no a realisa ningun detencion eynan. E caso cu awor ta andando ta esun di tiramento di boter den e club nocturno.
