Automobilistanan atento a nota un auto para band’i caminda diadomingo anochi pa 9:30 pm riba Avenida Nelson Oduber na altura di P.F. Chang’s. Un pareha tabata discuti den auto y un dado momento a nota cu e discucion a bay fo’i man y a bira agresion. Tur esaki dilanti e muchanan cu tabata grita den auto pa e tata stop di maltrata e mama. Na dado momento e mama a habri porta y baha for di auto y e pleito a sigui memey caminda!
Polis cu a yega na e sitio a topa cu e auto marca Chevrolet, modelo Vivant, color blanco, numera A-58540, pa colmo cu number bieu. E ta un auto cu polis a para varios biaha pa falta di tin su papelnan na ordo, pero cu pa falta di luga pa warda e auto, a opta cada biaha pa no bay cu e auto den beslag.
E biaha aki si e chauffeur su number a hunga, ya cu a tuma e auto den beslag y a detene e chauffeur cual na su turno a dobla y a cuminsa yora pa polisnan no deten’e, pasobra cu e no a haci nada.
Mientras cu polis tabata wardando riba transporte special pa hiba e homber ward’i polis, e señora victima di maltrato a haya lift pa cas, hunto cu su yiunan. Imagina cu tabata algun turista cu a presencia tur cos, a dicidi di para den banda y ofrece e señora un lift pa e por ta na un luga sigur cu su yiunan.
