Cuerpo Especial Arubano (CEA) a cuminsa awe mainta cu bishita hende na cas pa cobra boetnan habri. E intencion di e bishita mainta tempran aki ta pa busca personanan cu debe di boet y hiba nan KIA pa nan sinta nan castigo. Awe CEA no mester a hiba ningun hende KIA, pasobra e personanan a paga e boetnan mesora!
Ministerio Publico ta haci un biaha mas un yamada urgente na personanan cu debe boet, pa pasa paga urgente. Por paga online via cuenta bancario # 4000905 di Aruba Bank bao mencion di e parketnummer. Tambe por pasa swipe na balie di Ministerio Publico. No lubida si pa haci un afspraak prome via e website www.omaruba.com. Sin afspraak no por drenta e edificio. Preguntanan tocante boetnan por manda pa [email protected]. Por haci uzo tambe di e formulario di contacto riba e website pa haci pregunta.
E accion di cobra boet a start na juli 2021 na aeropuerto, unda a cuminsa para pasaheronan cu debe boet. Luna pasa a saca e anuncio cu CEA lo cuminsa busca hende cu debe boet na cas y hiba nan KIA pa nan sinta nan dianan. KIA a prepara algun cel specialmente pa esaki, tanto pa hende homber como pa hende muhe. E accion a bay asina bon cu Ministerio Publico a dicidi pa warda te awe pa start cu e ehecucion.
No laga yega asina leu cu CEA ta para na porta di cas. Areglonan di pago no ta posibel mas pa personanan cu un condena irevocabel pa boetnan di trafico.
