A constata violacion di reglanan di Covid-19, impone pa crisisteam, na Jo-ann Bar & Restaurant na Mahuma. Consecuentemente polis a cera e establecimiento y a core cu tur e clientenan for di e sitio. E proceso a bay trankil, sin ningun novedad of lantamento ni di e gerente ni tampoco di esunnan cu tabata disfrutando di nan diabierna anochi.
Diabierna den careda di 8:00 pm a drenta informe na polis cu a constata cu Jo-Ann Bar no ta cumpli cu e reglanan encuanto Covid-19 y a opta pa cera e negoshi. Aunke gobierno a laga sa cu lo bay suavisa algun di e medidanan di prevencion pa plamamento di e virus, esey no ta kita afo cu henter e task-force ta bishitando varios establecimento na Aruba pa controla si nan ta cumpli cu e reglanan stipula.
Awe nochi a toca turno na Jo-Ann Bar & Restaurant na Mahuma pa ricibi un di e bishitanan inespera aki. A controla encuanto e regla di distanciamento social, uzo di tapaboca, cantidad di hende na mesa, etc. A constata suficiente violacion pa drenta den accion y laga cera e luga, por lo menos pa awe nochi.
Dos unidad di polis na e sitio a percura pa e bar a cera sin problema. Na final tur hende a bandona y a detene un solo persona. Motibo exacto di su detencion no ta conoci.
